Россияда хорижий агент мақоми берилган «Дождь» телеканали яна эфирга чиқишга ҳозирлик кўрмоқда

Россия ҳукумати томонидан «ОАВ-хорижий агент» деб таснифланган ва Украинада уруш бошланганидан кейин Россия Федерациясидаги фаолиятини тўхтатган «Дождь» телеканали 18 июлдан қисман ўз кўрсатувини қайта тиклайди. Таҳририят Youtube-каналида кечки жонли кўрсатувларни йўлга қўйишни ва бир қатор муаллифлик дастурларини қайтаришни режалаштирмоқда, дея хабар берди 16 июль куни «Холод» нашрига «Дождь» бош директори Наталя Синдеева. Шу билан бирга, кузда «катта, жиддий ишга тушириш» режалаштирилган, деди у. 

Синдеева телеканал яқинда Европа лицензиясини олганини эслатиб, айни дамда бир қанча шаҳарларда студиялар яратиш бўйича ишлар олиб борилаётганини айтди. Шу билан бирга, у «Россия армиясини обрўсизлантириш» тўғрисидаги қонун қабул қилинганидан кейин Россияда трансляция қилиш имконсиз бўлиб қолганини таъкидлади, чунки бу ҳокимият позициясига тўғри келмайдиган ҳар қандай нашрлар учун жавобгарлик билан таҳдид солади. 

Июнь ойи бошида Латвия Электрон ОАВ бўйича миллий кенгаши (NEPLP) «Дождь» телеканалига эфирга чиқиш лицензиясини берди. Кенгаш раҳбари Иварс Аболиншнинг таъкидлашича, трансляция бўйича музокаралар тахминан уч ой давом этди. Ўз навбатида, «Дождь» бош муҳаррири Тихон Дзядконинг айтишича, турли студияларда - Латвия, Нидерландия, Франция ва Грузияда трансляциялар олиб борилиши режалаштирилган. «Кичикдан бошлаймиз ва аста-секин эфир тармоғи бўйлаб кенгайтирамиз», дея қўшимча қилди у. 

«Дождь» телеканали Украинада уруш бошланганидан бир ҳафта ўтиб, 4 март куни Россия Федерациясидаги фаолиятини вақтинча тўхтатди. Бош директор Наталя Синдееванинг сўзларига кўра, бу эфир, YouTube ва ижтимоий тармоқлардаги трансляцияларга тегишли бўлди. Бунгача, 1 март куни «Дождь» сайти блокланган эди. «Бизга нафас чиқариш ва қандай ишлашни тушуниш учун куч керак. Ҳақиқатан ҳам эфирга қайтамиз деб умид қиляпмиз», - деди Синдеева. Телеканал Россияда 2010 йилнинг апрель ойидан бери фаолият юритиб келмоқда.