Роскомнадзор қидирув тизимларига Wikimedia’ни қонунбузар деб белгилаб қўйишни буюрди

«Википедия» Россияда аллақачон 5 миллион рубль жаримага тортилган, аммо Роскомнадзор талаб қилганидек, мақолаларни олиб ташламаган. Энди қидирув тизимлари Wikimedia Foundation Россия қонунларини бузаётгани ҳақида хабар бериши керак бўлади.

Фото: Eric Risberg / AP

«Википедия» Россия ҳукумати «Украинадаги уруш ҳақидаги фейклар» деб баҳолаган бир қатор материалларни ўчиришдан бош тортгани сабабли Роскомнадзор (РКН) қидирув тизимларига онлайн энциклопедия ишини қўллаб-қувватловчи Wikimedia Foundation’ни Россияда қонунбузар деб белгилашни буюрди. Бу ҳақда идоранинг 20 июль, чоршанба куни чоп этилган хабарида айтилади.

«Wikipedia интернет-ресурсида (Wikimedia Foundation, Inc.’га тегишли) тақиқланган деб тан олинган бир қатор материаллар, жумладан, Украина ҳудудида махсус ҳарбий операция ўтказилаётгани ҳақидаги фейклар ўчирилмаган», — дейилади Роскомнадзор маълумотида.

Хабарда қайд этилишича, интернет-компанияга нисбатан кўрилган чоралар Россия қонунчилиги бузилиши тўлиқ бартараф этилмагунча ўз кучида қолади.

Россияда Wikimedia Foundation «ноқонуний маълумотни» олиб ташламагани учун бир неча бор маъмурий жавобгарликка тортилган, компанияга жами 5 миллион рубль миқдорида жарима белгиланган. 3 миллион рубль миқдоридаги жарималардан бирига Украинадаги ҳарбий амалиётлар ҳақида «нотўғри маълумот» берилган еттита мақола эълон қилингани сабаб бўлди. Бундан ташқари, суд Wikimedia’ни портловчи моддалар - порох ишлаб чиқариш ҳақидаги иккита мақола учун 2 миллион рубль миқдорида жаримага тортди.