Владикавказда намойишлар иши бўйича уч нафар айбланувчи 8 йилдан 10 йилгача қамалди

Владикавказдаги норозилик намойишларидан аввал Санкт-Петербургда яшаган опера хонандаси Челдиев Telegram’да акция ҳақида эълон қилди. Суд уни тадбир ташкилотчиси деб тан олди ва 10 йилга озодликдан маҳрум қилди. Яна икки айбланувчига 8,5 ва 8 йил муддат берилди.

Владикавказдаги намойишлар / Фото: ТАСС

Шимолий осетиялик опера хонандаси Вадим Челдиев 2020 йил апрель ойида Владикавказда бўлиб ўтган «ўзини ўзи изоляция қилиш режими»га қарши норозилик намойишларини уюштирганликда айбланиб, 10 йилга қамалди. Бу ҳақда 19 июль, сешанба куни «Агора» халқаро инсон ҳуқуқлари гуруҳи раҳбари Павел Чиков хабар берди. Унга кўра, Ростов области суди ушбу ҳаракатларнинг яна икки «ташкилотчиси»: Рамис Чиркиновга 8 йил ва Арсен Бесоловга 8 ярим йил озодликдан маҳрум этиш жазоси тайинлаган.

Чиковнинг суд залида бўлган адвокат Андрей Сабининдан иқтибос келтиришича, барча айбланувчилар норозилик намойишларини уюштирганликда айбдор деб топилган.

2020 йил 20 апрелда Шимолий Осетия пойтахтида коронавирус чора-тадбирларига қарши намойишга йиғилганлар сиёсий талабларни илгари сура бошлаган: ҳукумат ва республика раҳбари Вячеслав Битаровни истеъфога чиқариш, муддатидан олдин сайловлар ўтказиш ва Санкт-Петербургда коронавирус ҳақида фейклар тарқатгани учун ҳибсга олинган фаол ва опера хонандаси Вадим Челдиевни озод қилиш. Челдиев ўз Telegram-каналида Владикавказда коронавирус чекловларига қарши йиғилиш ўтказилиши ҳақидаги хабарни эълон қилган.

Намойишчилар ва Москвадан келган Росгвардия ходимлари ўртасидаги тўқнашувлар сабабли РТҚ миллий гвардиячилар ва полициячиларга нисбатан зўравонлик қўллаш ҳамда ҳокимият вакилига қаршилик кўрсатиш билан боғлиқ безорилик бўйича жиноий иш қўзғатди. Кейинчалик безорилик иши оммавий тартибсизликлар уюштириш тоифасига айлантирилиб, унга экстремистик фаолиятга чақириш айблови қўшилди. Фақат Челдиевга нисбатан зўравонлик айби қўйилган, у Санкт-Петербургдан Владикавказга олиб кетилаётганда полиция машинасида қаршилик кўрсатган.

Челдиевга нисбатан фейкларни тарқатиш бўйича иш даъво муддати ўтгани сабабли тугатилди.

20 апрель куни 2000 дан ортиқ одам иштирок этган норозилик намойишида 100 дан ортиқ иштирокчи ҳибсга олинган, улардан 65 нафари икки кундан 15 суткагача маъмурий қамоққа олинган. 20 дан ортиғи жиноий иш бўйича айбланувчига айланди, камида ўн кишига 6 ярим йилгача бўлган ҳақиқий муддатлар берилди.