АҚШ конгресси Трампни Капитолийга ҳужум вақтида атайин ҳаракат қилмаганликда айблади

АҚШ конгресси вакиллар палатасининг Капитолийга ҳужумни тергов қилиш комиссияси ўша пайтдаги давлат раҳбари Доналд Трампни атайин ҳаракат қилмаганликда айблади. Комиссия раиси Бенни Томпсоннинг 22 июль, пайшанба куни кечқурун комиссия очиқ эшитувида маълум қилишича, лавозимидан кетаётган президент бир неча соат давомида ўз тарафдорлари томонидан содир этилган зўравонликларни тўхтатиш учун атайлаб чора кўрмаган.

Унинг сўзларига кўра, Трамп ҳокимиятда қолиш учун «қонунсизлик ва коррупция йўлидан» борган. Демократияни ҳимоя қилиш учун 2021 йил 6 январда юз берган ҳодисанинг «айбдорлари учун кучли оқибатлар» зарур, дея талаб қўйди Томпсон.

Демократнинг таъкидлашича, 2020 йилги президентлик кампанияси давомида Доналд Трамп овоз бериш натижаларини бекор қилиш учун «қўлидан келган барча ишни қилган». «У ёлғон гапирган, қўрқитган, қасамига хиёнат қилган. Демократик институтларимизни йўқ қилишга уринган», - дея таъкидлади конгрессмен. Энди, унинг сўзларига кўра, «қонун олдида, Америка халқи олдида жавоб бериш» керак.

Ўз навбатида, республикачи конгрессмен Адам Кинзингернинг маълум қилишича, Капитолийга ҳужум юз берган куни Трамп уч соат давомида ўз тарафдорларини тартибни сақлашга чақиришдан бош тортган ва шу билан қасамёдни бузган. Трампнинг партия ичидаги танқидчиси бўлган сиёсатчи шундай деди: «Ошхонадаги қулай шароитда ҳужум авж олаётган пайтда у телевизор кўраётган эди». Унинг сўзларига кўра, аралашмаслик ўша пайтдаги президентнинг хатоси эмас, балки онгли қарори бўлган. Унинг тажовузкор тарафдорлари бўлган оломон Конгрессда президентлик сайловлари натижалари ва Жо Байденнинг ғалабасини тан олиши бўйича ўтказилаётган жараённи тўхтатиб қўйган, шу билан Трамп ўз мақсадига эришган, дея қўшимча қилди Кинзингер.

2021 йил 6 январда Вашингтондаги митингда нутқ сўзлаганидан сўнг АҚШ президентлик сайловларида мағлуб бўлган Доналд Трампнинг радикал тарафдорлари Капитолийга бостириб киришди, у ерда сенат ва вакиллар палатаси қўшма йиғилиши иштирокчилари овоз бериш натижаларини маъқуллаётган бўлган. Намойишчилар бинога бостириб киришга муваффақ бўлган, конгрессдаги мунозаралар бир неча соатга тўхтатилган, қонун чиқарувчилар эвакуация қилинган. 

Тартибсизликлар иштирокчилари полиция билан тўқнашган, полиция кўздан ёш оқизувчи газ қўллаш билан жавоб берган. Миллий гвардия Вашингтонга етиб келган. Тўқнашувлар давомида беш киши ҳалок бўлди, улардан бири полициячи. Расмийлар бир неча соатдан кейин яна конгресс биносини назоратга олди. Кейинги ҳафталарда яна икки полициячи ўз жонига қасд қилди. Тартибсизликлардан кейин 50 га яқин одам қўлга олинди, уларнинг бир нечасига айблов эълон қилинди. 

Капитолийга ҳужумдан кейин АҚШ конгресси вакиллар палатаси комиссияси Трампнинг ўша даврдаги воқеалардаги ролини аниқлаш учун 140 мингдан ортиқ ҳужжатларни ўрганиб чиқди ва мингдан ортиқ гувоҳлар билан суҳбатлашди. Июнь ойи бошидаги биринчи йиғилишида комиссия Вашингтондаги тартибсизликлар учун биринчи навбатда Трампни жавобгар деб ҳисоблади. «6 январь кунги давлат тўнтаришига уриниш, ҳукуматни ағдаришга бўлган шафқатсиз ҳаракатнинг авж нуқтаси бўлди. Зўравонлик тасодиф эмас эди. Бу Трампнинг сўнгги уриниши эди», - деди Бенни Томпсон. Саккизинчи йиғилишдан сўнг комиссия ишида танаффус эълон қилинди, сентябрь ойида янги эшитувлар ўтказилади. Трампнинг ўзи айбини тан олмади ва 2024 йилда АҚШ президентлиги учун яна ўз номзодини қўйиши мумкинлигини билдирди.