Кремль Шрёдернинг Россия Украина билан музокараларга тайёрлиги тўғрисидаги гапига изоҳ берди

Герҳард Шрёдер Stern ва n-tv телеканалларига берган интервьюсида Россия Украина билан низони дипломатик йўл билан ҳал этишга тайёрлигини айтганди.

Фото: DPA

Кремль расмий вакили Дмитрий Песков Россия Украина билан тинчлик музокараларига «ўз шартлари асосида» тайёрлигини айтди.

«Ҳа, Россия дарҳақиқат Украина муаммоси дипломатик йўл билан ҳал этилишига тайёр – ўз шартлари асосида», — деди Песков.

Унинг қўшимча қилишича, «бу шартлар бўйича Истанбулда келишилган» ва музокара жараёнининг ҳар иккала иштирокчиси бунга рози бўлган. Шундан сўнг Украина «музокара йўлидан» чиқиб кетди, деди Песков.

Аввалроқ Песков Кремлда Германия собиқ канцлери Герҳард Шрёдер ва Россия президенти Владимир Путин учрашуви ўтказилганини тасдиқлаганди.

Шрёдер учрашувдан сўнг Stern ва n-tv телеканалларига берган интервьюсида Россия Украина билан низони дипломатик йўл билан ҳал этишга тайёрлигини айтди.