Хитой ташқи ишлар вазири G7 мамлакатларининг қўшма баёнотини "макулатура" деб атади

Ван Ининг сўзларига кўра, баёнотда "тўғри ва нотўғри, оқ ва қора аралашиб кетган, тажовузкорлик оқланиб, ҳимояланаётганлар қораланган".

Фото: AP/ТАСС

Хитой ташқи ишлар вазири Ван И G7 мамлакатларининг Пекиннинг АҚШ вакиллар палатаси спикери Нэнси Пелосининг Тайванга ташрифига билдирган реакцияси бўйича эълон қилинган қўшма баёнотини "макулатура" деб атади.

"Баёнот деб аталган бу нарсани шунчаки макулатура парчаси деб ҳисоблайман", - деди у Камбожа пойтахти Пномпенда ўтказилган АСЕАН мамлакатлари ташқи ишлар вазирлари йиғилишидан сўнг Хитой ОАВга берган интервьюсида.

"Ички ишларга аралашмаслик – дунёдаги тинчлик ва барқарорликни сақлаб туришнинг асосий тамойили. Биз мамлакатлар орасидаги муносабатларда яна чангалзор қонуни устунлик қилишига йўл қўя олмаймиз", - дея қўшимча қилди Ван И.

Унинг сўзларига кўра, баёнотда "тўғри ва нотўғри, оқ ва қора аралашиб кетган, тажовузкорлик оқланиб, ҳимояланаётганлар қораланган".

"Хитой томони бу "баёнот"га қатъиян қарши чиқади", - деб таъкидлади Ван И.

Аввалроқ "еттилик" мамлакатлари Пекиннинг Пелосининг Тайванга ташрифидан сўнг амалга ошираётган ҳаракатлари муносабати билан хавотир билдирганди.

"Еттилик гуруҳи" мамлакатлари Пекинни минтақадаги статус-квони куч билан ва бир томонлама тартибда ўзгартирмасликка, Тайбэй билан келишмовчиликларни тинч йўл билан ҳал қилишга чақирган.