Пентагон: Украинада 80 мингга яқин рус аскари ўлдирилган ёки яраланган

Украинада уруш бошланганидан буён 70 мингдан 80 минггача россиялик ҳарбийлар ҳалок бўлган ёки яраланган. Бу ҳақда 8 август, душанба куни АҚШ мудофаа вазири ўринбосари Колин Коул журналистларга маълум қилиб, гап жанг майдонида ҳалок бўлган ва ярадор бўлган тахминий йўқотишлар ҳақида кетаётганини таъкидлади. «Бу кўрсаткич бироз пастроқ ёки бироз юқорироқ бўлиши мумкин, аммо ҳақиқий рақамлар шу атрофида», деди у. 

Шу билан бирга, Пентагон вакилининг қайд этишича, бундай «жиддий» йўқотишларга қарамай, Россия февраль ойи охирида Украинага бостириб кириш чоғида президент Владимир Путин эълон қилган мақсадлардан бирортасига ҳам эриша олмаган. «Унинг асосий мақсади бутун мамлакатни қўлга киритиш, Киевда ҳокимиятни алмаштириш ва Украинани мустақил, суверен ҳамда демократик давлат сифатида йўқ қилиш эди. Буларнинг ҳеч бири содир бўлмади», - дея таъкидлади Коул. У Украина томони ҳам катта йўқотишларга учраганини тан олди, бироқ ҳеч қандай рақам келтирмади. 

Москва ва Киев урушда ҳалок бўлганлар сонини ошкор этмаяпти. РФ Мудофаа вазирлиги улар ҳақида охирги марта 25 март куни хабар берганди. Ўшанда 1351 киши ҳалок бўлгани ва 3825 киши жароҳатлангани эълон қилинган. Давлат думаси мудофаа қўмитаси раиси Андрей Картаполов июнь ойи бошида Россия Украинада ҳарбий ҳаракатлар олиб боришга ёндашувини ўзгартириб, ҳарбий хизматчиларни йўқотишни амалда тўхтатганини айтди. 

Коул Россия томонидан бошланган урушни «Иккинчи жаҳон урушидан бери оддий қуроллардан фойдаланган ҳолда Европада кузатилаётган энг кучли тўқнашув» деб таърифлади. Ҳозирда у устунликни украиналиклар томонида кўрмоқда. Унинг фикрича, УҚК руҳий ва жанговар тайёргарлик бўйича руслардан устундир. Украиналиклар учун «кўп нарса хавф остида. Улар ўз мамлакатлари омон қолиши учун курашмоқда», - деди Пентагон расмийси.