Танзила Норбоева Ислом бирдамлиги ўйинларида ғолиб ва совриндор бўлган ўзбекистонлик велоспортчиларни табриклади

Сенат раиси Танзила Норбоева Ислом бирдамлиги ўйинларида катта натижаларга эришган ўзбекистонлик велоспортчиларни эътироф этди.

Кonya-2021 ўйинларида Ўзбекистон велоспорт терма жамоаси велотрек йўналишида ўтказилган баҳсларда жами 6 та медални қўлга киритди.

“Халқаро спорт ареналарида Ўзбекистон байроғи баланд кўтарилиши, назаримда, шу ватанда яшайдиган ҳар бир инсон учун энг гўзал ва ҳаяжонли лаҳзалардир! Чунки бу нафақат спортчиларимиз, балки ватанимиз эришган ютуқ! Шунинг учун ғалаба онларининг завқи, гашти ўзгача. Туркиянинг Коня шаҳрида давом этаётган V Ислом бирдамлиги ўйинларида спортчиларимиз эришаётган ютуқлар барча юртдошларимизга ана шундай онларни туҳфа этаётганидан жуда мамнунман”, дейди Сенат раиси.

Таъкидланишича, Кonya-2021 ўйинларида Ўзбекистон велоспорт терма жамоамиз велотрек йўналишида ўтказилган баҳсларда жами 6 та медални қўлга киритди: 1 та олтин, 2 та кумуш ва 3 та бронза.

“Айнан велоспортчилар ушбу турнирда Ўзбекистон учун илк олтин медалга сазовор бўлди!” дейди Танзила Норбоева. 

Велотрекнинг очколар пойгаси йўналишида ўтган баҳсда Олга Забелинская энг яхши натижа билан чемпион бўлди. Мазкур йўналишда яна бир ўзбекистонлик Янина Кускова кумуш медалга сазовор бўлди. Алексей Фомовский трекнинг яккалик таъқиб пойгаси дастурида бронза медалига, София Каримова скретч бўйича гуруҳ пойгасида бронза медалини қўлга киритди. Мусобақа якуний кунида Алексей Фомовский омниум пойгасида учинчи натижани қайд этиб, жамоага яна битта бронза медалини олиб келди.

“Ғурур билан айтиш жоизки, юртимиз спортчилари турли йўналишларда юқори натижалари билан бизни шод этмоқдалар! Барча спортчиларимизни ажойиб ғалабалари билан табриклаймиз! Ватан байроғини баланд кўтаришда сизларга кучли ирода ва мустаҳкам соғлиқ тилаб қоламан, азиз спортчилар!” дейилади Сенат раисининг табригида.

Маълумот учун, Сенат раиси Танзила Норбоева Ўзбекистон Велоспорт федерацияси раиси ҳисобланади.