АҚШ Ўзбекистонни ЖСТга аъзо бўлиш жараёнида қўллаб-қувватлашни давом эттиради

Ўзбекистон бош вазири ўринбосари – инвестициялар ва ташқи савдо вазири Жамшид Хўжаев кеча АҚШ элчиси Дэниель Розенблюм билан учрашув ўтказди.

Фото: Dunyo

Томонлар савдо-иқтисодий соҳадаги ҳамкорликни чуқурлаштириш истиқболларини кўриб чиқди. 2022 йил биринчи яримида ўзаро товар айланмаси 31 фоизга ўсгани ва бу кўрсаткич 247,5 млн долларга етгани қайд этилди. Савдо муносабатларини жадаллаштириш ҳамда импорт-экспорт операциялари номенклатурасини кенгайтириш бўйича аниқ тадбирлар белгиланди.

Мулоқотда инвестициявий ҳамкорлик ва саноат кооперациясини ривожлантириш имкониятларига тўхталиб ўтилди. Сўнгги бир неча йил ичида Ўзбекистонда Америка капитали асосида ташкил топган корхоналар сони икки баравар кўпайиб, 315 тани ташкил этди. Ўзбекистонда Америка компаниялари иқтисодий иштирокини кенгайтиришга ўзаро қизиқиш билдирилди. Бунинг учун томонлар АҚШ етакчи компаниялари ва молиявий ташкилотларини мамлакат ҳудудида қўшма лойиҳаларни амалга оширишга жалб қилиш учун имкониятларни бирлаштиришни режалаштирди.

Учрашув давомида икки томонлама муносабатлар ўзаро манфаатли бошқа масалалар ҳам кўриб чиқилди. "Яшил" энергетика, қишлоқ хўжалиги ва ёшлар тадбиркорлигини ривожлантириш доирасида АҚШ Халқаро тараққиёт агентлиги билан ҳамкорликни давом эттириш, истиқболли соҳаларда турли лойиҳаларни амалга оширишда АҚШ Халқаро тараққиёт молия корпорацияси билан ҳамкорликни фаоллаштиришга келишиб олинди.

Дэниэль Розенблюм АҚШнинг Жаҳон савдо ташкилотига аъзо бўлиши жараёнида Ўзбекистонни қўллаб-қувватлашни давом эттиришга содиқлигини билдирди.