Евроиттифоқ Ўзбекистонда қонун устуворлиги соҳасида қўшма лойиҳаларни амалга оширади

Ўзбекистон ТИВ раҳбари адлия бўйича еврокомиссар билан музокаралар ўтказди.

Фото: Dunyo

Ўзбекистон ташқи ишлар вазири вазифасини бажарувчи Владимир Норов бошчилигидаги делегация адлия масалалари бўйича еврокомиссар Диде Рейндерс билан учрашди.

Ўзбекистон ва Европа иттифоқи ҳамкорлиги, қонун устуворлиги соҳасидаги алоқаларни янада ривожлантириш истиқболлари муҳокама қилинди.

Диде Рейндерс Европа иттифоқи Ўзбекистоннинг демократик институтлар фаолиятини мустаҳкамлаш, фуқаролик жамиятини ривожлантириш, сўз ва дин эркинлигини таъминлашга хайрихоҳлигини қўллаб-қувватлаётганини қайд этди.

Европа томони Ўзбекистондаги ислоҳотлар дастурини амалга оширишда кўмак кўрсатиш, қонун устуворлиги соҳасида қўшма лойиҳаларни ҳаётга татбиқ этишда ҳамкорликка тайёрлигини билдирди.

Ўзбекистон конституциясига ўзгартиришлар киритиш тўғрисидаги қонун лойиҳаси моҳияти ва аҳамияти ҳақида маълумот тақдим этилди. Энг муҳим таклифлар қаторида ўлим жазосини тақиқлаш, Миранда қоидасини қўллаш, гумон қилинувчи, айбланувчи ёки судланувчи ҳуқуқларини кафолатлаш, “Ҳабеас корпус” институтини акс эттириш ва бошқаларга эътибор қаратилди.