«Мен буни бошқа даражада ҳал қиламан» — Песковнинг ўғли ҳарбий комиссариатга боришдан бош тортди

Алексей Навальнийнинг сафдошлари Россия президенти матбуот котиби Дмитрий Песковнинг ўғли Николай Чоулзга қўнғироқ қилишгани ва ундан Украинага жангга боришга тайёрлигини сўрашганини маълум қилишди.

Фото: Николай Песковнинг ижтимоий тармоқдаги саҳифаси

«Медуза» нашрининг ёзишича, Песковнинг ўғли билан суҳбат «Популярная политика» ютуб-каналининг жонли эфирида бўлиб ўтган. Канал бошловчиси Дмитрий Низовцев россиялик депутатлар, амалдорлар ва бизнесменларнинг фарзандларига қўнғироқ қилиб, улардан ҳарбий комиссариатга («военкомат») келишларини сўраган. Низовцев уларнинг телефон рақамларини қаердан олганига аниқлик киритилмаган.

Бошловчи Песковнинг ўғлига ҳарбий комиссар сифатида қўнғироқ қилган. У Николайга тиббий кўрикдан ўтиш учун эрталаб соат 10 да Москва ҳарбий комиссариатига келиши кераклигини айтган.

«Эртага 10 да табиийки бормайман. Агар менинг жаноб Песков эканлигимни билсангиз, у ерга боришим қанчалик нотўғри бўлишини тушунишингиз керак. Хуллас, бу ишни бошқа даражада ҳал қиламан», — деб жавоб қайтарган Низовцевнинг суҳбатдоши.

Гап қандай «даража» тўғрисида бораётгани ҳақидаги саволга у «нималар бўлаётгани ва қандай ҳуқуқлари борлигини тушуниб олиши» ҳамда «боришдан олдин маслаҳатлашиши кераклиги»ни айтган.

Бошловчи Песковнинг ўғлидан ҳарбий комиссариатга келишга тайёрлиги ҳақида яна бир бор сўраганида, у: «Эртага 10 да мени олиб кетишингизнинг сизга ҳам, менга ҳам кераги йўқ. Агар ватанни ҳимоя қилишим керак бўлса, бу мен учун ҳеч қандай муаммо эмас. У ерга боришим мақсадга қанчалик мувофиқлигини билишим керак. Сизга маълум бир сиёсий нюанслар ҳақида гапиряпман», деб жавоб берган.

У қандай «сиёсий нюанслар» ҳақида гапираётганига аниқлик киритишни рад этган.

«Ватанни ҳимоя қилишга тўғри келса, хавотир олманг, сизлар билан бирга бўламан. Эртага боришим ёки бормаслигим – бу иккинчи масала», — дея қўшимча қилган Песковнинг ўғли.

У ким билан гаплашгани ва қаерга бориши кераклиги тўғрисидаги маълумотни хабар тарзида юборишларини сўраган ҳамда қўнғироқ қилган шахс билан «боғланишлари»ни айтган.

Низовцев суҳбат охирида анкетага Песковнинг ўғли фронтга кўнгилли сифатида боришга тайёр деб ёзиш мумкинлигини сўраган.

«Йўқ, ундай деб ёзманг. Боришга тайёрман, лекин сизнинг илтимосингиз билан эмас, менга нима дейишса, шуни қиламан», — деб жавоб қайтарган Россия президенти матбуот котибининг ўғли. Бошловчи бу «Владимир Владимировичнинг буйруғи» эканлигини айтганида, Песковнинг ўғли: «Агар Владимир Владимирович у ерга боришим кераклигини айтса, бораман», деган.

«Ҳарбий комиссар» президент ҳар бир сафдорга бориш кераклигини айтолмайди деб эътироз билдирганида, суҳбатдоши: «Мен сафдормасман... Бу суҳбатдан фойда йўқ», деб жавоб қайтарган.

Дмитрий Песков Навальнийнинг сафдошлари ўғли билан гаплашганини тасдиқлаган. У «Подъем» нашрига берган интервюсида ўғлининг ҳарбий комиссариатга боришдан бўйин товлаганини рад этган ва Николай Чоулзнинг журналистлар билан суҳбатидан айрим қисмлар кесиб ташланганини айтган.

«Аввал бутун суҳбатни жойлаштиришсин. Унинг ягона тўғри танловига шубҳам йўқ. Унда ҳам», — деган Дмитрий Песков.