1 октябрдан мол-мулкка тақиқ қўйилгани тўғрисидаги электрон маълумотлар банки жорий этилади

2022 йил 1 октябрдан “Нотариус” автоматлаштирилган ахборот тизимида мол-мулкни бошқа шахсга ўтказиш тақиқлаб (хатлаб) қўйилгани, тақиқлаб (хатлаб) қўйиш бекор қилингани тўғрисидаги электрон маълумотлар банки жорий этилади.

Ҳукумат қарори билан тасдиқланган низомга кўра, мол-мулкка тақиқ қўйилгани тўғрисидаги электрон маълумотлар банки жорий этилади. Маълумотларни электрон маълумотлар банкига киритишда:

• жисмоний шахс шахсига оид ва автомототранспорт воситаларига оид маълумотлар – Ички ишлар вазирлиги;
• юридик шахсга оид маълумотлар – Адлия вазирлиги;
• кўчмас мулкка оид маълумотлар – Кадастр агентлиги;
• қишлоқ хўжалиги, мелиорация ва йўл-қурилиш техникаларига оид маълумотлар – Агросаноат мажмуи устидан назорат қилиш инспекцияси;
• аттракционлар ва кўтариш иншоотлари (минора кранлари)га оид маълумотлар – Саноат хавфсизлиги давлат қўмитаси;
• кемаларга оид маълумотлар – Транспорт вазирлиги;
• кичик ҳажмли кемаларга оид маълумотлар – Фавқулодда вазиятлар вазирлиги Кичик ҳажмли кемалар инспекцияси электрон ахборот тизимлари орқали реал вақт режимида амалга оширилади.

Нотариус электрон маълумотлар банки орқали мол-мулкни бошқа шахсга ўтказишни тақиқлаб қўйиши ва тақиқни бекор қилиши мумкин. Мол-мулкни бошқа шахсга ўтказишни тақиқлаб ёки хатлаб қўйиш, уни бекор қилишда тўлов ундирилмайди.