Айрим фуқаролардан кадастр бўйича кўрсатилган давлат хизмати учун йиғим ундирилмайди

«Давлат хизматлари янгиликлари» каналида ёзилишича, унга мувофиқ энди қонунчилик ҳужжатларига мувофиқ аҳоли пунктлари номланиши ва чегаралари ўзгарганда, бир ҳудуддан бошқа ҳудудга ўтказилганда (турар ёки нотурар кўчмас мулк объектида реконструкция, қўшимча ва алоҳида қурилиш мавжуд бўлган ҳоллар бундан мустасно) давлат хизматлари кўрсатилгани учун йиғимлар ундирилмаслиги белгиланди.

Сенатнинг «Тошкент вилояти Зангиота, Юқори Чирчиқ, Ўрта Чирчиқ ва Қибрай туманлари ҳамда Тошкент шаҳри Сергели, Бектемир, Мирзо Улуғбек ва Яшнобод туманлари, шунингдек, Тошкент вилояти ва Тошкент шаҳри чегараларини ўзгартириш тўғрисида»ги қарори билан Тошкент вилояти бир қатор аҳоли пунктлари Тошкент шаҳрига ўтказилган бўлиб, ушбу ҳудудларда яшовчи аҳоли мазкур қулайликдан фойдаланиши мумкин.

Билдирилишича, бир туман ёки шаҳар маълум бир қисмининг иккинчи туман ёки шаҳарга қўшилиши ёки янги туман/шаҳар шаклида ташкил этилиши, келгусида ушбу ҳудудларда яшовчи аҳоли яшаш манзили номига ва кадастр ҳужжатларига тегишли ўзгартиришлар киритиш заруратини юзага келтиради.

Ўз навбатида, фуқаролар мавжуд кадастр ҳужжатларини янгисига алмаштиришда қонунчилик ҳужжатларига мувофиқ маълум бир тўловларни амалга оширган.