Эрдўған Финландия ва Швеция ваъдаларини бажармагунича уларнинг НАТОга кириш учун аризалари маъқулланмаслигини айтди

Туркия президенти Ражаб Тоййиб Эрдўған Финландия ва Швеция ваъдаларини бажармагунича уларнинг НАТОга кириш учун аризалари Туркия томонидан ратификация қилинмаслигини айтди. 

«Бизга берилган ваъдалар бажарилмагунича принципиал позициямизни сақлаб қоламиз. Қарийб 40 йилдан бери терроризмга қарши курашаётган, ўн минглаб фуқаролари терроризм қурбони бўлган мамлакат сифатида бу масалада ҳеч кимга ён бермоқчи эмасмиз»,— деди Эрдўған.

Ҳозирда НАТОга аъзо 30 давлатдан 28таси Швеция ва Финландиянинг алянсга қўшилиши тўғрисидаги ҳужжатни ратификация қилди.

Ратификация қилмаган икки мамлакат - Венгрия ва Туркия қолди.

Аввалроқ Туркия бу мамлакатларнинг аризаларини қўллаб-қувватламаслигини билдирганди. Анқаранинг таъкидлашича, Швеция ва Финландия Туркияда террорчи деб эълон қилинган Курдистон ишчи партияси тарафдорларини қўллаб-қувватлайди. 

Бундан ташқари, Анқара Швециядан ташкилот аъзоларини экстрадиция қилишни ҳамда Туркияга қурол сотишга қўйилган эмбаргони бекор қилишни талаб қилганди.

30 сентябр куни Швеция қурол экспортини назорат қилиш давлат агентлиги (ISP) Туркияга қурол экспорт қилишга қўйилган эмбаргони бекор қилди.