Қозоғистонда Тўқаевга суиқасд қилишни режалаштиришда айбланган шахс 17 йилга қамалди

Апрелда Қозоғистон миллий хавфсизлик қўмитаси "Қозоғистон раҳбари ва қатор юқори лавозимдаги амалдорларга суиқасд қилишни режалаштирган хориж разведкаси агенти" қўлга олинганини хабар қилганди.

Фото: zakon.kz

Остона суди давлатга хиёнат ва Қозоғистон президенти Қосим-Жўмарт Тўқаевга нисбатан суиқасд тайёрлашда айбланган шахсни 17 йил муддатга озодликдан маҳрум қилди.

Қозоғистон миллий хавфсизлик қўмитаси 3 апрелда "Қозоғистон раҳбари ва қатор юқори лавозимдаги амалдорларга суиқасд қилишни режалаштирган хориж разведкаси агенти" қўлга олинганини хабар қилганди.

Хабарда айтилишича, у бир вақтнинг ўзида махсус хизматлар ва ҳуқуқни муҳофаза қилиш органлари ходимларига нисбатан террорчилик ҳаракатларини амалга оширишни режалаштирган.

Тинтув вақтида ундан хорижда ишлаб чиқарилган снайпер милтиғи, гиёҳвандлик моддалари ва йирик миқдорда пул топилган.