Шавкат Мирзиёевнинг Венгрияга ташрифи доирасида қишлоқ хўжалигига оид катта ҳужжатлар тўплами имзоланади

Президент Шавкат Мирзиёевнинг Венгрияга расмий ташрифи арафасида қишлоқ хўжалиги вазири Азиз Воитов Венгрия қишлоқ хўжалиги вазири ўринбосари Шандор Фаркаш ҳамда Қишлоқ хўжалиги ва табиий фанлар университети ректори Чаба Дюрич билан музокаралар ўтказди.

Учрашувда Ўзбекистон президентининг Венгрияга ташрифи доирасида имзолаш учун салмоқли ҳужжатлар тўплами тайёрланди. Уларда боғдорчилик, иссиқхона хўжалиги, картошкачилик, узумчилик, балиқчилик, шунингдек, суғурта, аграр фан ва таълим соҳаларида ҳамкорликни ривожлантириш бўйича қўшма режалар ўз ифодасини топган.

Мулоқот давомида томонлар Ўзбекистон-Венгрия марказига келгуси йилда ишга туширилиши режалаштирилган молекуляр диагностика лабораториясидан самарали фойдаланиш бўйича ўқув дастурини ташкил этишда кўмаклашишга келишиб олди. 

Лойиҳани самарали амалга ошириш учун Венгрия қишлоқ хўжалиги ва табиий фанлар университетини бош маслаҳатчи этиб тайинлаш таклиф қилинди.