Солиқ тўловчиларга солиқларни бўлиб тўлаш ёки муддатини кечиктириш имкони берилади

“Ҳуқуқий ахборот” каналида ёзилишича, бундай имкониятдан қуйидаги асослардан биттаси мавжуд бўлганда фойдаланиш мумкин:

• солиқ тўловчига табиий офат, технологик фалокат ёки бошқа бартараф этиб бўлмайдиган ҳолатлар натижасида зарар етказилгани;
• солиқ тўловчини бюджетдан молиялаштириш кечиктирилгани ёки давлат эҳтиёжи учун бажарилган ишлар ҳақини тўлаш кечиктирилгани;
• солиқни бирйўла тўлаш натижасида унинг банкротлиги аломатлари пайдо бўлиши хавфи юзага келгани;
• фаолиятини 3 йилдан кўп даврдан буён амалга ошираётгани ҳамда ҳисобланган солиқларни ўз вақтида тўлаб келгани, аммо молиявий аҳволига кўра солиқ қарзини белгиланган муддатларда тўлаш имкониятига эга бўлмагани;
• тадбиркорлар солиқ тўлашни кечиктириш тўғрисидаги хабарномани ер, бинолар ва иншоотларга бўлган мулк ҳуқуқи давлат рўйхатидан ўтказилгандан 3 ойда солиқ органларига юборган бўлса;
• жисмоний шахс мулкий ҳолати солиқни бирйўла тўлаш имкониятини истисно этиши;
• товарлар ёки хизматларни ишлаб чиқариш ва реализация қилиш мавсумий хусусиятга эга экани;
• Ўзбекистон божхона чегараси орқали товарлар олиб ўтилиши муносабати билан божхона тўғрисидаги қонунчиликда белгиланган тўланиши лозим бўлган солиқларни тўлашни кечиктириш ёки бўлиб-бўлиб тўлаш имкониятини бериш учун асослар мавжуд экани.