2023 йилда 75 минг нафар ногиронлиги бўлган шахслар пенсиясига ўртача 300 минг сўм қўшилади

Сенат Хотин-қизлар ва гендер тенглик қўмитасида “Фуқаролар давлат пенсия таъминоти тўғрисида”ги қонунга пенсия тайинлаш тартибини такомиллаштиришга қаратилган ўзгартиш ва қўшимчалар киритиш ҳақида”ги қонун муҳокама қилинди.

2023 йил 1 январдан бошлаб I ва II гуруҳ ногиронлиги бўлган шахслар пенсия тайинланганидан кейинги камида 1 йиллик иш стажи ва иш ҳақи миқдоридан келиб чиқиб, ҳар 2 йилда бир маротаба тайинланган пенсия қайта ҳисобланади ҳамда пенсия миқдорига қўшиб борилади.

Қонун қабул қилинса, 2023 йилда (1994–2022 йилларда иш стажига эга бўлган) 75 минг нафар ногиронлиги бўлган шахслар пенсияларига ўртача 300 минг сўм қўшилади ҳамда келгусида меҳнат фаолиятини олиб борганлар (бугунги кунда 43 минг нафари расман банд) пенсияси ҳар 2 йилда (иш стажи ва ойлик иш ҳақидан келиб чиқиб) бир маротаба қайта ҳисоблаб борилади.

Қонун билан ўгай ота-она, вафот этган ўгай фарзандини тарбиялаган даврини аниқлаш тартиби ҳамда Ўзбекистон олдида алоҳида хизматлари бўлган шахслар пенсияларига устамаларни тўлаш тартиби ҳукумат томонидан белгиланиши кўзда тутилмоқда.

Қонун қабул қилиниши амалиётда қўллашда юзага келаётган турли хил ёндашувлар олдини олиш, коррупциоген факторларни келтириб чиқарувчи ҳолатларга барҳам бериш, ижтимоий адолат тамойилидан келиб чиқиб, ногиронлиги бўлган шахсларнинг даромадини оширишга хизмат қилади.