ОАВ: Германияда киберхавфсизлик идораси раҳбари Россия билан алоқалари туфайли ишдан олинади

Германия ички ишлар вазири Нэнси Фазер Ахборот хавфсизлиги федерал бошқармаси (BSI) раҳбари Арне Шёнбом ўрнига бошқа номзод топиш ниятида. Бу ҳақда 10 октябр, душанба куни ўз манбаларига таяниб, Германиянинг Bild нашри ёзди. Бу маълумотни Handelsblatt ва Der Spiegel манбалари ҳам тасдиқлади.

ОАВ маълумотларига кўра, Фезер «иложи борича тезроқ» бўлимнинг амалдаги раҳбарини лавозимидан четлатиш ниятида, унинг вазифаларига немис кибермаконини ҳакерлик ҳужумларидан ҳимоя қилиш киради. У 13 октябрга режалаштирилган BSI 2022 фаолияти тўғрисидаги ҳисобот тақдимоти ҳамда идора билан биргаликда матбуот анжуманларида иштирок этишдан бош тортди.

Оммавий ахборот воситаларига кўра, Шёнбомдан норозилик ZDF телеканалида суриштирув эълон қилинганидан кейин пайдо бўлган, унга кўра мансабдор шахс журналистларнинг фикрига кўра, Россия махсус хизматларига яқин ҳисобланувчи Cyber-Sicherheitsrat Deutschland ассоциацияси билан алоқада бўлган бўлиши мумкин. Шу билан бирга, Шёнбомни Германия қонунчилигининг нюанслари туфайли лавозимидан оддийгина бўшатиб бўлмайди, у бошқа идорага ўтказилиши мумкин.

Бундестаг депутатлари аввалроқ Россиянинг Украинага бостириб кириши бошланганидан бери Германияга киберҳужумлар кўпайганини таъкидлаган эди – улар Германиядаги IT-хавфсизлик ҳолатини «ўта кескин» деб таърифлаган.

Хусусан, май ойида россиялик ҳакерлар Германиядаги ҳукумат сайтларига бир қатор DDoS-ҳужумларини амалга оширди. Мудофаа вазирлиги, Бундестаг, федерал полиция ва бир қатор федерал ҳудудларнинг полиция хизматлари порталлари ҳужумга учраган. Бундан ташқари, канцлер Олаф Шольцнинг сайти вақтинча ишламай қолди. Россиянинг Украинага қарши урушини қўллаб-қувватлаган Killnet ҳакерлик гуруҳи ҳужум учун жавобгарликни ўз зиммасига олди.

2022 йилнинг январида ўзининг мавжудлигини расман эълон қилган ва орадан кўп ўтмай Кремлга санкция қўйган давлатларга «уруш» эълон қилган Killnet ташкилотидан фарқли ўлароқ, энг машҳур халқаро ҳакерлик гуруҳларидан бири бўлган Anonymous Украинада уруш бошланганидан бери Россия ташкилотлари сайтларига ҳужум қилиб келмоқда. 

25 февраль куни Anonymous ҳакерлари RT каналига, март ойида эса Роснефтнинг Германиядаги шуъба корхонаси Rosneft Deutschland компьютерларига ҳужум қилишди. Ҳакерларнинг ўзига кўра, киберҳужум натижасида 20 терабайтлик маълумотлар эгаллаб олинган.

Бундан ташқари, беларуслик ҳакерлар - 2020 йилда мамлакатда ўтказилган сайловларда юз берган ҳолатлар туфайли ўз фаолиятини бошлаган «Киберпартизанлар» гуруҳи Россия тажовузкорлигига қарши очиқ курашмоқда. Улар Беларус темирйўл тизимига бир нечта муваффақиятли киберҳужумларни амалга ошириб, Беларусда жойлашган рус қўшинлари учун логистика муаммоларини келтириб чиқарди.