Божхона юк декларацияларини расмийлаштириш тартибига ўзгартириш киритилади

Давлат божхона қўмитасининг “Дастлабки, даврий ва тўлиқ бўлмаган божхона юк декларацияларини расмийлаштириш тартиби тўғрисидаги низомга ўзгартириш ва қўшимчалар киритиш ҳақида”ги қарори лойиҳаси эълон қилинди.

Тадбиркорлик субъектларига янада қулайликлар яратиш мақсадида, дастлабки божхона декларацияси орқали маълум қилинган товарларни тақдим этиш талабини айнан дастлабки божхона декларацияси қабул қилинган божхона органига эмас, балки исталган божхона органи (шунингдек, чегара божхона пости)га тақдим этиш имконияти яратилади.

Шунингдек, дастлабки божхона декларация тақдим этилган товарларни бевосита чегара божхона постларида эркин муомалага чиқариш тартиб-тамойилларини соддалаштириш мақсадида тегишли ўзгартириш ва қўшимчалар киритилади.

Шундан келиб чиқиб, мувофиқлик сертификатини ёки санитария-эпидемиология хулосасини олиш талаб этиладиган товарлар ушбу ҳужжатлар тақдим этилмаган ҳолда товарларни шартли чиқариб юбориш мумкинлиги белгиланади.

Ушбу товарлардан фойдаланиш, уларни учинчи шахсларга бериш, уларни сотиш ёки ўзга усулда бошқа шахсга ўтказиш орқали бериш тақиқланади.

Дастлабки декларацияланган товарлар транзит декларациясини хавфни бошқариш тизими орқали тегишли йўлакларга йўналтириш натижасида, товарлар манзил постга етиб келганида товарларни идентификациялаш учун улар божхона кўригини амалга ошириш ёки оширмаслик масаласига ойдинлик киритиш лозимлиги айтилади.

Ҳужжат билан тадбиркорлик субъектлари дастлабки божхона декларация тақдим этилган товарлар Ўзбекистон божхона ҳудудига кириб келишда чегара божхона постларида тўлиқ божхона юк декларацияси тақдим этилмасдан бевосита чегара божхона постларида эркин муомалага чиқариш имконияти яратилади.