Андижонда икки тадбиркорнинг келишмовчилиги сабаб 4 мингдан ортиқ аҳоли сувсизликдан қийналмоқда

Асака тумани Олақанот маҳалласида аҳолини ичимлик суви билан таъминлаш мақсадида иккита қудуқ қазиш режалаштирилган. Бир тадбиркор вилоят ҳокимининг оғзаки топшириғи билан ишни бошлаган. Аммо иш ярмига етганида тендерда бошқа МЧЖ ғолибликни қўлга киритган. Бунинг оқибатида бир йилдан буён сув тортиш ишлари қилинмаяпти, икки тадбиркорнинг келиша олмаётгани туфайли бутун бошли маҳалла ичимлик сувисиз қолмоқда.

“Маҳалламизда 563 та хонадонда 4113 нафар аҳоли истиқомат қилади. Улар бир неча йиллардан буён ичимлик сувини сотиб олади ёки 50 метр чуқурликдан тортиб чиқарилган, истеъмолга яроқсиз деб топилган сувдан фойдаланишади. Кўп ҳолларда эса сувни ташиб ичади”, – дейди маҳалла раиси Шоҳжахон Абдувалиев.

Маълум бўлишича, 2021 йил вилоят ҳокими томонидан оғир ҳудуд дея мазкур маҳаллада иккита қудуқ қазиш ва 9,5 км ичимлик суви тармоғини тортиш топшириғи берилади. Топшириқни “Golden Stroy” МЧЖ бажара бошлаган. 110 метр чуқурликда иккита қудуқ қазилган, янги трансформаторлар олиб келинган. Бироқ иш охирига етмай қолган. Сабаби, бу лойиҳани тендерда бошқа МЧЖ ютиб олган. Шундан кейин иш чала ҳолатда қолиб кетган.

“Ишни вилоят ҳокимининг топшириғи билан бошлаганман. Тендерда ютиб олган МЧЖ билан келишишга ҳаракат қилдим. Бироқ натижа бўлмади. Мен ҳам топшириқни бажариш учун ишни бошлаб, сув чиқарганман. Яхшигина пул сарфлаб қўйганмиз. Аммо тендерда ғолиб бўлган МЧЖ келишишни истамаяпти”, – дейди “Golden Stroy” раҳбари.

Асака тумани “Сувоқова” ДУК раҳбари Ҳусанбой Обиджоновнинг айтишича, сув чиқариш учун дастлаб маҳаллий бюджетдан пул ажратиш режалаштирилган. Лекин пул ажратилмагани сабаб 2022 йилга қолиб кетган. Тендер натижалари эса 2022 йил 10 август куни аниқланган ва унда “Оби ҳаёт қурилиш” МЧЖ ғолиб бўлган.

“Сувтаъминоти ва оқова сув объектлари қурилиши бўйича инжиниринг компанияси” УК Андижон вилояти ҳудудий бошқармаси мутахассиси Неъматилло Абдураҳмоновнинг маълум қилишича, бошқарма тендерда ғолиб бўлган МЧЖ билан шартнома тузган:

“Биз ҳамма ҳужжатларни тайёрлаб, тендерда ютган МЧЖ билан шартнома имзолаганмиз. Биринчи ишни бошлаган фирма билан иккинчиси келишиб олганми ёки йўқми, бундан хабардор эмасман. Биз қонуний тарзда, шаффоф бўлиб ўтган тендерда ютган ташкилот билан шартнома қилганмиз. Ҳужжатлар вилоят молия бошқармасига тақдим қилинган. Улар ҳужжатни тасдиқлаганидан сўнг вилоят ҳокими ўринбосари имзолаб бергач базага киритамиз ва иш бошланади. Биринчи МЧЖ ҳам тендерда қатнашиб, ютиши керак эди. Лекин унинг кўрсаткичлари паст бўлгани учун юта олмаган. Кимдир топшириқ берган ва қудуқни қазишни бошлаган”.

Олақанот маҳалласига қудуқ қазиш ва тармоқ тортиш ишлари учун 2 млрд 291 млн сўм ажратилиши белгиланган. 920 млн сўм маблағ олдиндан берилади, қолган сумма қўшимча шартнома қилиб, ўтказиб берилади.

Кўп йиллардан бери сувсизликдан қийналиб келган Олақанот маҳалласи аҳолиси ёғинли кунлар келмасдан тармоқлар тортилишини истайди. Бироқ “мен қуришим керак, пул сарфладим”, деб ишни чала ташлаб кетган тадбиркор ҳам, тендерда ғолиб бўлган тадбиркор ҳам ён бергиси йўқ, вилоят раҳбарлари эса масала ечимига шошилмаяпти. Жабр кўраётган эса яна халқ бўляпти.

Абдували Қурбонов,
Kun.uz мухбири