Маҳаллада ҳуқуқ-тартибот масканлари фаолиятини амалга ошириш тартиби белгиланди

“Маҳаллий давлат ҳокимияти тўғрисида”ги қонунга киритилган қўшимчага кўра, маҳалла ҳуқуқ-тартибот масканлари профилактика катта инспекторлари жамоат хавфсизлигини таъминлаш ҳолати тўғрисида ҳар 6 ойда халқ депутатлари туман (шаҳар) кенгашларига ҳисобот тақдим этади.

“Ички ишлар органлари тўғрисида”ги қонунга киритилган қўшимчага кўра, маҳалла ҳуқуқ-тартибот масканлари ички ишлар органлари фаолиятини бевосита маҳаллаларда жамоат тартибини сақлаш, ҳуқуқбузарликлар профилактикаси ва жиноятчиликка қарши курашиш бўйича, фуқаролар хавфсизлиги ва осойишталигини таъминлаш борасида ички ишлар органлари, бошқа ҳуқуқ-тартибот органлари ва жамоат тузилмалари ҳамкорликда ишлашини маҳаллалар кесимида ташкил этиш бўйича амалга оширадиган таркибий тузилмаси ҳисобланади.

Маҳалла ҳуқуқ-тартибот масканлари ўз фаолиятини қуйидаги таркибда амалга оширади:

• профилактика катта инспектори, профилактика инспектори, профилактика инспектори жамоат тартибини сақлаш бўйича ёрдамчиси (ҳар кунлик асосда);
• мазкур ҳудудда хизматни ўташ учун бириктирилган туман (шаҳар) ички ишлар органлари хотин-қизлар масалалари бўйича инспектори, пробация бўлинмаси инспектори, тезкор вакил, патруль-пост хизмати ходимлари;
• жамоат тартибини сақлаш ва ҳуқуқбузарликлар профилактикасига кўмаклашиш учун юборилган Миллий гвардия бўлинмаси ва бошқа ваколатли давлат органлари ходимлари, жамоат тузилмалари вакиллари.