“Бизга пулинг эмас, ўзинг кераксан” — Кореядаги ўзбек талабасининг ҳаётидан бир лавҳа

Болани қаттиқ назоратда ушлаш эмас, тўғри тарбия бериш, фикрлашни ўргатиш керак. Шундагина у қаерда бўлмасин, тарбияси йўл қўймаган ишни қилмайди. Ота-она доим фарзанд билан бирга бўлмаслиги мумкин, лекин улар берган тарбия ҳар доим бирга бўлади.

Жаҳонгир Ғаниев ҳам тўғри тарбия олган, қайда бўлмасин ота-онасининг юзини ерга қаратмайдиган йигит бўлиб улғайди. Бугун Кореяда таҳсил олаётган Жаҳонгир, ўқиш билан бирга уйдагиларига ёрдам бериш учун ишлайди. Унинг мусофирликдаги ҳаёти ҳақида ўзидан эшитамиз.

Деярли 1 ойдан кўп вақт давомида оилам олдидаги масъулиятим туфайли уйдагилар билан гаплашмадим. Ўтган 2-3 ой давомида озгина ишларим орқага кетиб уйга вақтида пул жўната олмадим.

Талаба бўлганим учун ота-онам шу кунгача ўзи оч қолса ҳам, қанча қийналса ҳам, мендан пул сўрашмаган. Катта фарзанд бўлганим учун ўзим ойма-ой, оз-оздан бўлса ҳам, уйга пул жўнатиб турардим. Сабаби Ўзбекистонда дадам топганлари рўзғордан ортмайди, баъзан етмай ҳам қолишини яхши ҳис қиламан.

Ёзги таътилда бир жойда ишлаб, пулимизни вақтида бермагани учун, айни контракт тўлайдиган пайтим иложсиз бировдан 3000 доллар қарз олдим. У пулни контрактим ва уйимнинг 6 ойлик тўловига бердим. 1 ойда қайтариш шарти билан олгандим, ишларим энди яхши кетаётган бир пайт тўсатдан бироз мазам қочиб бир ҳафтача шифохонага қатнашга мажбур бўлдим.

Тўплаётган пулларимнинг бир қисмини сарфлаб юбордим. Қарз бериш куни яқинлашиб келарди, лекин керакли суммани топа олмагандим, у олган одамим корейс бўлгани учун пулни вақтида қайтаришим керак эди. Ўзим яқин танишлардан пул излаш ва яна қарзни қарзга ёпиш режасини туздим. Яхши бир яқин акамиздан 15 кунга керакли суммани олиб, қарз олган одамимга вақтида пулни қайтардим.

Шу 2-3 ой озгина муаммолар гирдобида қолганим ва ота-онамга вақтида пул жўнатиб ёрдам қила олмаганим учун виждоним жудаям қийналиб кетганди. Ичимдан ўтган ҳиссиётларни сўз билан тасвирлаш қийин. Аллоҳимга шукур, кечки сменада ишлаб олган қарзларимнинг деярли ҳаммасидан қутулдим. Яна бироз ишлаб, уйимга пул жўнатдим.

Ота-онамга бошимдан ўтган ҳолатни тўлиқ тушунтирдим. Дадам бироз тергадилар, онам йиғлаб “Ўғлим, бизга шунча ёрдам қиляпсан, ҳаёт доим бир хил бўлавермайди, бир ундай, бир бундай. Қандай ҳолатда тушмагин, бизга хабарини бер, жудаям хавотир олдик. Бизга пулинг эмас, ўзинг, соғлигинг керак”, дедилар. Уларга энди бундай қилмайман, деб ваъда бердим.

Баъзан Аллоҳим бандасининг баъзи режаларини барбод қилиб тураркан, режалари бандасини барбод қилмасин деб. Аллоҳимга шукур, ҳозирча ишларим ҳаммаси яхши. Озроқ тўплаган пулимдан жўнатиб буважонимни Умрага юбориш ҳаракатидамиз, иншааллоҳ! Кейинги йилга ота-онамни ҳам Умра сафарларига жўнатишни ният қилганман.