«Энергоатом» ЗАЭС учун Каховска ГЭС тўғони портлатилиши хавфини таҳлил қиляпти

Украинанинг «Энергоатом» ширкати Каховска ГЭС тўғонининг эҳтимолий портлатилиши Запорижжя атом электр станцияси хавфсизлигига қандай таъсир этишини таҳлил қиляпти.

Фото: AP

«Каховска сув омбори тўғони, Каховска ГЭС шлюзлари (сув сатҳи турли бўлган бир жойдан иккинчи жойга кемаларни ўтказиш учун хизмат қилувчи гидротехник иншоот) ва устунлари миналаштириб қўйилгани ҳамда шунга мос равишда ушбу иншоотлар бузилиши хавфи юқори бўлгани ҳақидаги маълумотни ҳисобга олган ҳолда, «НАЭC «Энергоатом» Ядровий тартибга солиш агентлиги талабига биноан зудлик билан бундай бузилиш Запорижжя атом электр станциясининг ишлаши хавфсизлигига қандай оқибатлар келтириб чиқариши мумкинлигини таҳлил қиляпти», деб маълумот берди давлат корхонаси.

Матбуот хизматида таъкидланганидек, Каховска ГЭСнинг портлатилиши Каховска сув омборидаги сув сатҳининг ортга қайтарилмас даражада пасайишига олиб келиши мумкин, у эса ЗАЭС учун совитиш суви сифатида ишлатилади.

Бундан олдин Украина президенти Володимир Зеленский ўз видеомурожаатида Россия ҳарбийлари Каховска ГЭС агрегатлари ва тўғонини миналаб қўйганини маълум қилганди.

Агар ГЭС йўқ қилинса, бу оммавий қирғин қуролини қўллаш билан баробар бўлади, дея таъкидлаб ўтди у.

«Тўғоннинг портлатилиши кенг кўламли фалокатни англатади. Бундай теракт билан Россия ҳатто Днипро сувини Қримга етказиб бериш имкониятини ҳам йўқ қилиши мумкин. Каховска ГЭС тўғони бузилса, унда Шимолий Қрим канали ҳам шунчаки йўқ бўлиб кетади», — деди Зеленский.

Украина президенти жаҳон ҳамжамиятини Россиянинг янги терактининг олдини олишга чақирди.