АҚШ Арктикадан Россияга ракета зарбаси беришни синовдан ўтказди

Lockheed Martin компаниясининг JASSM-ER қанотли стелс-ракета палеталари Россия ҳудудигача етиб бориши мумкин.

Фото: Oklahoma Air National Guard

АҚШ Ҳарбий-ҳаво кучлари Rapid Dragon концепцияси доирасида Арктикада MC-130J Commando II самолётларини синовдан ўтказди.

Унинг доирасида узоқ масофага учувчи JASSM-ER қанотли стелс-ракета палеталари билан зарба бериш амалиёти синаб кўрилди.

«Бу ракеталар Россия ҳудудигача етиб бора олади... Биз иттифоқчиларнинг кенгайтирилган имкониятларини намойиш этиб, Россиянинг тажовузкорлигини, кенг қамровли хатти-ҳаракатларини тийиб туришга ҳаракат қилмоқдамиз», деди Европа махсус операциялари қўмондонлиги подполковниги Лоуренс Мелников.

Американинг Lockheed Martin компанияси 2021 йил сентябрь ойида хабар қилганидек, Rapid Dragon концепцияси самолётларни «қанотли ракеталарнинг ҳалокатли платформасига айлантиради. Улар тактик қирувчи ва стратегик бомбардимончиларнинг зарба бериш қобилиятини оширади».

Қайд қилинишича, палеталарнинг ишлатилиши «кўпроқ аэродромлардан кўпроқ нишонларга зарба бериш» имконини яратади.