Жо Байден ва Си Жинпинг G20 саммитида учрашади

АҚШ президенти Жо Байден ва Хитой раҳбари Си Жинпинг 15-16 ноябрь кунлари Индонезиянинг Бали оролида бўлиб ўтадиган G20 саммити доирасида иккитомонлама учрашув ўтказади.

Фото: Reuters

Давлат раҳбарларининг музокаралари ҳақида Оқ уй матбуот котиби Карин Жан-Пьер маълум қилди.

Баёнотга кўра, етакчилар Вашингтон ва Пекин ўртасидаги алоқа линияларини сақлаб қолиш ва кенгайтириш, икки давлат ўртасидаги рақобатни бошқариш, манфаатлар бир-бирига мос келадиган соҳаларда ишлаш борасидаги саъй-ҳаракатларни муҳокама қилади. Хусусан, унинг сўзларига кўра, гап «жаҳон ҳамжамиятига таъсир этувчи халқаро муаммолар устида ишлаш», яъни Украина, Тайван ва КХДР ҳақида бормоқда.

«Раҳбарлар бир қатор минтақавий ва глобал муаммоларни ҳам муҳокама қиладилар», деди Жан-Пьер. Шунингдек, Байден ва Си Жинпинг учрашуви якунлари бўйича қўшма баёнот режалаштирилмагани қайд этилган.

G20 — иқтисодий ривожланган ва ривожланаётган йирик мамлакатларни, жумладан АҚШ, Австралия, Буюк Британия, Германия, Канада, Хитой ва Россияни бирлаштирган ташкилотдир.