Венгрия банки «Ипотека банк»ни сотиб олиш бўйича жараённи тиклади

Украина-Россия уруши туфайли 2022 йилнинг апрел ойида Венгриянинг OTP Bank банки «Ипотека банк»нинг 75 фоиз улушини сотиб олиш бўйича тўловларни кечиктиришини маълум қилганди.

Фото: hungarytoday.hu

Венгриянинг энг йирик банкларидан бири — OTP Bank октябр ойида Ўзбекистондаги «Ипотека банк»ни сотиб олиш бўйича жараённи қайта бошлади. Бу ҳақда Венгрия банкининг молиявий директори Ласло Бенчик маълум қилди.

«Фикримизча, келишув амалга ошиши учун яхши имконият бор ва биз ҳақиқатан ҳам (лойиҳани амалга оширишдан) манфаатдормиз. Хусусан, бу «Ипотека банк»да жуда жозибали инвестиция имкониятини таъминлайди», дейди у.

Банк молиявий директори уруш бошланганидан бери «Ипотека банк» жозибадорлиги ошганини қўшимча қилган. Йил бошидан бери «Ипотека банк» 750 млрд сўмга яқин соф фойда олган.

2021 йилда Венгриянинг OTP Bank банки «Ипотека банк»нинг 75 фоиз улушини сотиб олиши маълум бўлганди. Бу ҳақда Ўзбекистон биринчи иқтисодий форумида бош вазир ўринбосари Жамшид Қўчқоров айтиб ўтганди.

Шундан сўнг 2022 йилнинг апрел ойида Венгрия банки Украина-Россия уруши сабабли OTP Bank «Ипотека банк»нинг хусусийлаштириш бўйича тўловларини бир неча ойга ортга суриш учун мурожаат қилди.

Маълум бўлишича, Россиянинг Украинага босқини сабаб OTP Bank 30 фоиз зарар кўрган.

Шу сабаб ипотека тўловларини бироз муддатга кечиктиришни сўраган, аммо тўлов шартлари ўзгариши ҳақида маълумот берилмаганди.