«Камаз»ни лизингга олгандик» – Қорақалпоғистонда ёқиб юборилган юк машина эгаси етказилган зарарни ундириб беришни сўради

Бухоро вилояти судида кўрилаётган Нукус воқеалари бўйича бугун фуқаровий даъвогар ҳамда жабрланувчиларнинг кўрсатмалари тингланди. Хусусан, фуқаровий даъвогар – фарғоналик шахс Нукус воқеаларида унга тегишли бўлган юк машинаси ёқиб юборилгани ҳамда катта миқдорда зарар кўрганини маълум қилди.

Фото: Kun.uz

Бухоро вилояти судида Нукус воқеалари бўйича кўриб чиқилаётган суд иши давом эттирилди. Суд ишида жабрланувчилар ҳамда фуқаровий даъвогар тингланди.

Фуқаровий даъвогарга кўра, у лизинг асосида Kamaz юк машинасини харид қилган ҳамда Қорақалпоғистонда ишлаётган бўлган. Нукус воқеалари содир этилган куни ҳайдовчи юк машинани техник кўрикка олиб борган ва қайтишда кўчада оломонга дуч келган. Жараёнда машина ёқиб юборилган ва ҳайдовчига тан жароҳати етказилган.

Даъвогарнинг таъкидлашича, машинанинг таннархи 652 млн сўм. Аммо у лизингга олинган. Шу сабабли етказилган умумий зарар миқдори 966 млн сўмни ташкил қилмоқда. У суддан мазкур зарарни ундириб беришни сўради.

Шунингдек, судда жабрланувчиларнинг ҳам кўрсатмалари тингланди.

Олдинроқ суд ишини жонли эфирда узатиш вақтинча тўхтатилгани, гувоҳлар ва жабрланувчилар бир-бирларининг кўрсатмаларини эшитиб қолмаслиги учун прокурор ЖПК 432-моддасига мувофиқ эфирни тўхтатишни сўрагани ҳақида хабар берилганди.

«Бир инсофлиси четга тортиб, жонимни сақлаш учун қочишим кераклигини айтди» — Нукусда юк машинаси ёқиб юборилган ҳайдовчи

#суд жараёни #Нукус воқеалари

1-2 июл кунлари Қорақалпоғистон маркази Нукус шаҳрида тартибсизликлар кузатилди. Миллий гвардия ходимлари билан тўқнашувларда 200 дан ортиқ киши яраланган, 18 киши ҳалок бўлган.