Оиладаги зўравонликни росмана жиноят деб баҳолаш вақти келди — Саида Мирзиёева

25 ноябрдан 10 декабргача Ўзбекистонда гендер зўравонликка қарши 16 кунлик кампания бўлиб ўтмоқда. Кампания доирасида 6 декабр куни Тошкентда Зўравонликка қарши курашни институтлаштириш мавзусида халқаро конференция бўлиб ўтди.

Конференцияда сўз олган Президент администрацияси шуъба мудири Саида Мирзиёева охирги йилларда кўплаб ишлар қилинганига қарамай, гендер зўравонлик борасида бирор арзигулик ўзгариш йўқлигини айтди.

“Янги лавозимга келишим биланоқ, аввало, хотин-қизлар ҳуқуқларини ҳимоя қилишга оид қонунчиликни ўргана бошладим. Барча қонунларимиз тенгликка асосланган. Лекин биз зўравонликка нисбатан жуда сабрлимиз. Менимча, эндиликда зўравонликнинг ҳар қандай кўринишига аёлларгина эмас, биринчи навбатда давлатнинг ўзи қарши эканлигига урғу беришимиз лозим. Оиладаги зўравонлик фақат бир оиланинг ички иши эмас, бу муаммо ва масъулият бутун жамиятга тегишлидир.

Аёл ўз дарди билан ёлғиз қолиб кетмаслиги керак. Вояга етмаганлар билан жинсий алоқа қилганлик учун жазо чораларини кучайтириш зарур. Бу борада болалар ва ўсмирларни ҳимоя қилишнинг аниқ ва қатъий механизмларини ишлаб чиқиш лозим. Оиладаги зўравонликни росмана жиноят деб баҳолаш вақти келди.

Зўравонликка қарши курашнинг барча босқичларида тўлақонли ишлайдиган механизм яратиш зарур. Бу эса ҳамма тегишли идора ҳамда вазирликлар, шунингдек, нодавлат сектор ва ОАВнинг биргаликдаги фаолиятини талаб этади”, – деди Саида Мирзиёева.

Сенат раиси Танзила Норбоева ўз нутқдиа Бирлашган Миллатлар Ташкилоти ҳисоботларидаги аянчли рақамларни келтириб ўтди.

Унга кўра, бугунги кунда дунёдаги аёлларнинг ҳар учинчиси гендер зўравонликка учрайди ва бу кўрсаткич сўнгги 10 йил давомида ўзгаргани йўқ. Ачинарлиси, ҳар соатда 5 нафардан зиёд аёл ёки қиз ўз оила аъзоларининг зўравонлиги оқибатида ҳаётдан кўз юммоқда.

Норбоева зўравонликка қарши курашда журналистларнинг ҳиссаси катта эканини қайд этди.

“Тегишли салбий ҳолатларни юзага чиқарадиган ва бизнинг эътиборимизни жалб қила оладиган биринчи манба, албатта, ОАВ ҳисобланади. Жойлардаги ўрганишлардан, шу жумладан, журналистлар ва блогерларимиз кўтарган муаммолардан келиб чиқиб, қабул қилинган қонунларимиз чуқур танқидий равишда таҳлил қилиб чиқилди. Ва уларнинг айрим жиҳатлари ҳақиқатан ҳам такомиллаштирилиши кераклиги таъкидланди. Бу мақсадда Сенатимиз ҳузурида тегишли ишчи гуруҳ шакллантирилди. Мазкур гуруҳ томонидан соҳага оид қонун лойиҳалари тайёрланди. Яқин кунларда ушбу ҳужжатларни кўриб чиқиш жараёни бошланди”, – деди у.

Сенат раисининг қўшимча қилишича, бу масалада таълимнинг ҳам ўрни катта бўлиб, унинг барча босқичларида – боғчадан бошлаб то олий таълимгача ўқув жараёнида гендер тенглиги, зўравонликка муросасизлик ва барқарор ривожланиш мақсадларининг бошқа йўналишларини ўргатиб бориш зарур.