Беларусда Лукашенкони танқид қилган олимпиада совриндори Надежда Остапчук қўлга олинди

2008 йилги олимпия ўйинлари бронза медали соҳибасининг қўлга олинишига нима сабаб бўлгани ҳозирча номаълум. Аввалроқ Надежда Остапчук бир неча бор Лукашенко сиёсатини очиқчасига қоралаган эди.

Фото: Getty Images

Минскда ҳуқуқ-тартибот идоралари ходимлари беларуслик таниқли спортчи, 2008 йилги ёзги олимпия ўйинларининг ядро улоқтириш бўйича бронза медали соҳибаси Надежда Остапчукни қўлга олди. Бу ҳақда 15 декабрь, пайшанба куни «Хартия-97» портали ва «Ҳаёт учун мамлакат» хайрия жамғармаси хабар берди.

Қайд этилишича, Остапчук ҳозирда Окрестина кўчасидаги Минск тергов изоляторида сақланяпти. Қўлга олиш сабаблари номаълум, хавфсизлик кучлари унинг учун посилкани қабул қилишдан бош тортяпти.

Аввалроқ Надежда Остапчук Беларус раҳбари Александр Лукашенконинг сиёсатини, хусусан, ўзгача фикрловчиларга қарши репрессияларни бир неча бор қоралаган эди.

2020 йилги президентлик сайловларидан кейин спортчи 2005 йилда Европа чемпионатида қўлга киритган олтин медалини кимошди савдосида 11 100 долларга сотди. У тушган маблағни Лукашенко режимидан жабр кўрган спортчилар ва сиёсий маҳбусларга ёрдам бериш учун сарфлади.