Қўшимча функционаллар
-
Тунги кўриниш
Молия вазири: “Давлат ташкилотларининг қисқаришидан бўшайдиган бюджет маблағлари ижтимоий масалаларни ҳал этишга йўналтирилади”
Сенатнинг ўттиз олтинчи ялпи мажлиси ўз ишини бошлади. Мажлисда “2023 йил учун Давлат бюджети тўғрисида”ги қонун кўриб чиқилмоқда.
Сенат йиғилишида иштирок этаётган Kun.uz мухбирининг хабар беришича, молия вазири Темур Ишметов ўз маърузасида 2023 йилги давлат бюджетида ҳукумат органларининг қисқариши ҳисобга олинганми, деган масалага изоҳ бериб ўтган.
Темур Ишметовга кўра, давлат ташкилотларининг қисқаришидан бўшайдиган бюджет маблағлари ижтимоий масалаларни ҳал этишга йўналтирилади:
“Хабарингиз бор, президент фармони билан 2023 йил 1 январдан мустақил фаолият юритувчи республика ижро этувчи ҳокимият органлари сони 61 тадан 28 тагача, жумладан, амалдаги 25 та вазирлик 21 тагача қисқартирилди. Табиийки, муҳокама қилинаётган “2023 йил учун Давлат бюджети тўғрисида”ги қонун лойиҳасида мазкур ислоҳотлар ҳисобга олинганми, деган савол туғилади. Таъкидлаш жоизки, ушбу фармон ижросини таъминлаш учун қайта ташкил этилаётган республика ижро этувчи ҳокимият органлари фаолиятини тўлақонли йўлга қўйиш чора-тадбирлари асосида уларнинг тузилмалари, вазифа ва функцияларини аниқ белгиловчи норматив хужжатлар тайёрланмоқда. Улар тасдиқлангандан сўнггина республика ижро этувчи ҳокимият органларининг сақлаш харажатларига аниқлик киритилиб, белгиланган тартибда қонунга ўзгартириш ва қўшимчалар киритилади. Бунда шу ислоҳотлар натижасида бўшайдиган бюджет маблағлари президент топшириғига асосан ижтимоий масалаларни ҳал этишга йўналтирилади”.
