Исроилнинг Дамашқ аэропортига берган зарбаси оқибатида тўрт киши ҳалок бўлди

2 январь, душанбага ўтар кечаси Исроил Дамашқ халқаро аэропортига ракета ҳужуми уюштирди, натижада тўрт киши, жумладан, икки суриялик аскар ҳалок бўлди, дея маълум қилди Сурия инсон ҳуқуқлари кузатув маркази (SOHR). «Тўрт нафар жангчи, жумладан, икки нафар суриялик ҳарбий ҳалок бўлди. Шунингдек, ракеталар «Ҳизбуллоҳ» ва эронпараст гуруҳларнинг аэропорт биноси ичидаги ва ташқарисидаги позицияларига, жумладан, ўқ-дорилар омборига зарба берди», - дейилади хабарда.

Ўз навбатида, ҳарбий манба Суриянинг давлатга қарашли SANA ахборот агентлигига Исроил Дамашқ халқаро аэропорти ва унинг атрофига ракеталар отганини, натижада икки суриялик аскар ҳалок бўлганини айтди. Хабар қилинишича, аэропорт ишламаяпти. 

Етти ойдан камроқ вақт ичида бу Исроилнинг Дамашқ аэропортига иккинчи ҳужуми бўлиб, у ерда эронпараст қуролли гуруҳлар ва Ливаннинг «Ҳизбуллоҳ» радикал ҳаракати жангарилари жойлашган. 

Жорий зарба Исроил армияси раҳбарияти 2023 йилга мўлжалланган операциялар режасини тақдим этганидан бир неча кун ўтиб содир бўлди. «Биз Суриядаги ҳаракатларимиз узлуксиз ва тизимли ҳарбий чоралар бутун минтақадаги таъсирнинг ўзгаришига олиб келганига мисол эканлигини кўрмоқдамиз. Биз Сурияда «Ҳизбуллоҳ» 2.0 мавжудлигини қабул қилмаймиз», - дейилади хабарда.