Чехиядаги президентлик сайловида иккинчи тур ўтказилади

Андрей Бабиш ва Петр Павел иккинчи турга йўл олди.

Андрей Бабиш ва Петр Павел

Чехиянинг собиқ бош вазири Андрей Бабиш ва НАТО Ҳарбий қўмитасининг собиқ раиси Петр Павел президентлик сайловининг иккинчи турида иштирок этади. Бу ҳақда EFE агентлигига таяниб Interfax хабар берди.

Сайлов бюллетенларнинг 80 фоизи санаб чиқилганидан кейин Бабиш 36 фоиз, Павел эса 34 фоиз овоз тўплаган. Учинчи ўринда 14 фоиз овоз билан Мендел қишлоқ ва ўрмон хўжалиги университетининг собиқ ректори Дануше Нерудова бормоқда.

Президентлик сайловининг иккинчи тури 27-28 январ кунларига белгиланган.

Бабиш ANO марказчилар сиёсий ҳаракатининг етакчиси ва ҳозирда парламентдаги мухолифатни бошқаради. Душанба куни суд Бабишни Европа Иттифоқининг 2 миллион евролик субсидиясини нотўғри ишлатганлиги юзасидан очилган жиноят иши бўйича оқлаган эди. Бу сайлов олдидан унга қўшимча куч бағишлади.

Павел, Ғарб оммавий ахборот воситалари таъкидлаганидек, қатъий ғарбпараст йўналишга амал қилади. Хусусан, у можарога барҳам бериш ва Украинани кўпроқ қўллаб-қувватлаш тарафдори. Бабиш ҳам можарога барҳам бериш тарафдори, аммо ҳукуматни Украина манфаатларини Чехиядан устун қўйгани учун танқид қилади.

Чехия Республикасида президент асосан тантанавор функцияларга эга. Бироқ, айнан у бош вазир ва марказий банк аъзоларини тайинлайди ва Конституциявий судга судьяларни таклиф қилади.