Ахборот кодекси юзасидан таклифлар инобатга олиниб, лойиҳа халқаро ташкилотларга ўрганиш учун юборилади – АОКА

2022 йилнинг 14-29 декабрь кунлари жамоатчилик муҳокамаси учун эълон қилинган Ахборот кодекси лойиҳаси юзасидан журналист ва блогерлар, фаоллар томонидан 80 га яқин таклиф ва мулоҳазалар билдирилди. АОКАнинг билдиришича, мазкур таклиф ва эътирозларнинг ҳар бири ўрганилган ҳолда лойиҳанинг тегишли жойлари қайта ишланади ва Адлия вазирлигига ҳуқуқий экспертизадан ўтказиш учун қайта киритилади.

Шунингдек, 2023 йил март-апрель ойларига қадар Адлия вазирлигидан ҳуқуқий экспертизадан ўтказилган ҳамда келишилган лойиҳа матни ЕХҲТнинг Демократик институтлар ва инсон ҳуқуқлари бўйича бюроси ҳамда ОАВ масалалари бўйича вакили каби халқаро экспертларга ўрганиш учун етказилади.

Май-июнь ойларида халқаро ташкилотларнинг таклифлари асосида тайёрланган кодекс лойиҳаси ОАВ вакиллари ва журналистлар иштирокида давра суҳбатида шаклида муҳокама ўтказилади.

АОКАнинг қўшимча қилишича, Ахборот кодекси лойиҳаси Олий Мажлисга киритилгач, Қонунчилик палатаси томонидан биринчи ўқишда қабул қилинса, лойиҳа матни қуйи палатанинг расмий сайтида эълон қилиниши керак. Бундай тартиб «Олий Мажлиси Қонунчилик палатаси Регламенти тўғрисида»ги қонуннинг 15-моддасида ҳамда Қуйи палата регламентининг 142-моддаларида мустаҳкамланган.

Маълумот учун, муҳокамага чиқарилган Ахборот кодекси 131 моддадан иборат бўлиб, соҳага доир 8 та қонунни унификация қилади. Ҳужжат – Ўзбекистонда ахборотдан фойдаланиш, уни эркин ва монеликсиз излаш, олиш ҳамда тарқатишга доир жараёнларни тартибга солишни мақсад қилган.

Муҳокамага қўйилган Ахборот кодекси лойиҳасида цензура қилиш, ахборотни яшириш ва ОАВни жазолаш учун «лазейкалар» бор. Шунингдек, журналистларнинг нафақат парламент, балки ҳукумат йиғилишларига ҳам эркин кириши, ОАВнинг дронлардан фойдаланишига рухсат берилиши каби янгиликлар ҳам йўқ эмас. Kun.uz ушбу ҳужжат лойиҳасининг энг муҳим нуқталарига эътибор қаратиб, ўз таклифларини берган эди.