Трамп АҚШ президентлиги сайловлари учун кампаниясини бошлади

Трамп Нью-Хемпшир ва Жанубий Каролинадаги тарафдорларига мурожаат қилиб, Байденни Украинага нисбатан тутган йўли учун танқид қилди. Мутахассисларнинг фикрича, митингларнинг оҳанги анча пасайган.

Фото: Getty Images

Собиқ давлат раҳбари Доналд Трамп 2024 йил 5 ноябрда АҚШ президентлигига сайловлар учун сайловолди кампаниясини Нью-Хемпшир ва Жанубий Каролина штатларида нутқ сўзлаш билан бошлади - бу штатларда, одатда, бирламчи сайловлар анча эрта ўтказилади. CBS News телеканалининг 28 январь, шанба куни хабар беришича, Трамп асосан Жо Байден маъмуриятининг Украинадаги уруш, АҚШ қўшинларининг Афғонистондан олиб чиқилиши ва АҚШ-Мексика чегарасидаги иммиграция каби ташқи сиёсат қарорларини танқид қилишга эътибор қаратган.

«Энди мен кўпроқ ғазабланаман, энди мен кампанияга ҳар қачонгидан ҳам кўпроқ содиқман», деди Трамп Республикачилар партиясининг Салемдаги (Нью-Хемпшир) йиғилиши иштирокчиларига, шундан сўнг у Колумбияга (Жанубий Каролина) йўл олди.

Reuters таъкидлаганидек, иккала митингнинг оҳанги анча паст эди. Шундай қилиб, Колумбияда собиқ президент штат Капитолийси биносида атиги 200 га яқин тарафдорлари билан суҳбатлашди, сиёсатчига Жанубий Каролина губернатори Генри Макмастер ва сенатор Линдси Грэм ҳамроҳлик қилди. Шу билан бирга, штат вакили бўлган беш нафар республикачи, шунингдек, президентликка потенциал номзод сифатида кўрилаётган Жанубий Каролина сенатори Тим Скотт тадбирда қатнашмади.

Кўплаб республикачилар Оқ уй раҳбари лавозимига ўз номзодларини илгари суришни ўйламоқда, деб хабар бермоқда Reuters. Бунга Флорида губернатори Роналд Десантис ҳам киради, кўпчилик таҳлилчилар уни Трамп учун энг катта сиёсий таҳдид деб билишади. Нью-Хемпшир губернатори Крис Сунуну ва Жанубий Каролинанинг собиқ губернатори Никки Хейли ҳам номзодликни кўриб чиқмоқда.

АҚШнинг собиқ президенти Доналд Трамп 2022 йил 15 ноябрда Флоридадаги Мар-а-Лаго қароргоҳида нутқ сўзлаб, 2024 йилги президентлик сайловларида иштирок этишини маълум қилди. Сиёсатчи мамлакатга «буюклик ва шон-шуҳрат»ни қайтариш ниятида эканини айтди.

Республикачилар партиясидан президентликка расмий номзод бўлиш учун Трамп праймериз ва кокусларда ғалаба қозониши керак. Улар 2024 йил февраль ойида бошланади ва июнгача давом этади. Пойгада қатнашиш ҳақидаги расмий қарор ёзда Республикачилар ва Демократик партияларнинг қурултойларида қабул қилинади.

АҚШнинг амалдаги президенти Жо Байден 2022 йил 9 ноябрда қайта сайланиш учун кураш олиб бориш режасини эълон қилди, бироқ у якуний қарорни фақат 2023 йил бошида қабул қилишини огоҳлантирди.