Молдова Европа Иттифоқидан россияпараст олигархларга қарши санкциялар жорий этишни сўради

Молдова ТИВ раҳбари Брюсселга Европа Иттифоқидаги ҳамкасблари билан «Молдовага қарши гибрид уруш олиб бораётган» россияпараст сиёсатчилар ва олигархларга қарши санкциялар жорий этиш масаласини муҳокама қилиш учун келди.

Фото: AP

Кишинёв Европа Иттифоқидан «Россия билан биргаликда Молдовани беқарорлаштиришга уринаётган коррупцион олигархлар ва сиёсатчилар»га қарши санкциялар жорий қилишни талаб қилмоқда. Бу ҳақда Молдова ташқи ишлар вазири Нику Попеску 20 февраль, душанба куни Брюсселда бўлиб ўтган Европа Иттифоқи ташқи ишлар кенгаши йиғилишида маълум қилди.

Унга кўра, жазо чоралари активларни музлатиш ва виза беришни тақиқлашни ўз ичига олиши керак. Шу йўл билан Молдова ҳукумати бу олигархларнинг «ички сиёсатга пул киритиш ва ҳукуматни ағдаришга уринишлари учун намойишчилар ҳамда потенциал хавфли гуруҳларга пул тўлаш» имкониятларини чеклашга умид қилмоқда», деб тушунтирди вазир.

«Бу коррупцион сиёсатчилар Россия билан ҳамкорликда ишлаётгани, Россиядан очиқ жамоатчилик ёрдамини олаётгани ва Молдовага қарши гибрид уруш олиб бораётгани аниқ», - деди Попеску. Унинг таъкидлашича, ўз мамлакатига гибрид таҳдидлар сирасига сиёсий партияларни ноқонуний молиялаштириш, пулли намойишлар, киберҳужумлар, бомбалар ҳақидаги ёлғон хабарлар, энергия таъминоти ва уларнинг нархини манипуляция қилиш киради.

Молдова Ташқи ишлар вазирлиги раҳбари муҳокама қилинаётган сиёсатчиларнинг исмини айтмади, лекин улар Молдовадан қочиб кетгани, улардан бири Исроилда экани ҳамда АҚШ ва Буюк Британия санкциялари остида эканликларини эслатиб ўтди. Бу икки давлат 2019 йилда Молдовадан қочган олигархлар Илан Шор ва Владимир Плахотнюкка нисбатан коррупция бўйича айбловлар туфайли жазо чоралари қўллаган.