АҚШ Украинага 10 миллиард долларлик бюджет ёрдами ажратади

АҚШ Украинага бюджет ёрдами ва мамлакат энергетика тизимини қўллаб-қувватлаш сифатида 10 миллиард доллар ажратади, дейилади Давлат департаменти сайтида.

Фото: AFP

Маблағнинг катта қисми (9,9 миллиард доллар) Жаҳон банки механизмидан келиб тушади ҳамда «соғлиқни сақлаш, таълим ва фавқулодда вазиятлар хизматлари» фаолиятини қўллаб-қувватлашга йўналтирилади.

Яна 250 миллион доллар Украина энергетика тизимига йўналтирилади.

«Ушбу маблағлар Украина бўйлаб мактаблар, шифохоналар учун генераторлар, уйлар ва бошпаналарни иситишни таъминлашга ёрдам беради», — дейилади баёнотда.

АҚШ Мудофаа вазирлиги Украинага 2 миллиард долларлик янги ҳарбий ёрдам пакетини эълон қилди.

Унга, хусусан, Himars ялпи ўт очиш реактив тизимлари учун ўқ-дорилар, лазер билан бошқариладиган ракета тизимлари учун ўқ-дорилар, дронларнинг бир нечта турлари, шу жумладан модернизация қилинган Switchblade 600 камикадзе дронлари, Россия учувчисиз учиш аппаратларига қарши жанговар қуроллар, электрон урушларни аниқлаш учун ускуналар , артиллерия ўқ-дорилари, шунингдек, миналарни тозалаш учун ускуналар киради.

Пентагон биринчи марта Украина оладиган ўқ-дорилар миқдори ҳақида ҳеч қандай маълумот бермади.