Россияда дўконига украин шаҳарлари номларини ёзиб чиққан фаол ҳибсга олинди

Ленинград областининг Русско-Высоцкое қишлоғида яшовчи тадбиркор ва фаол Дмитрий Скурихинга нисбатан Россия армиясини «обрўсизлантириш» бўйича иккинчи жиноий иш қўзғатилган. Бу ҳақда «Сетевые свободы» нашри хабар бермоқда.

«ОВД-Инфо» маълумотига кўра, ушбу фаолга қарши янги иш очиш учун асос унинг Украинага кенг кўламли босқиннинг бир йиллигида ўтказган акцияси бўлган — 2023 йил 24 февралида Скурихин «Прости Украина» сўзлари ёзилган плакатни кўтарган ҳолда бир кишилик митингга чиққанди.

Ҳуқуқ фаоллари хабар беришича, Скухирин 25 феврал куни қўлга олинган, у тунни вақтинча сақлаш изоляторида ўтказган.

26 феврал куни Ленинград области Ломоносов суди терговнинг Скухиринни ҳибсга олиш тўғрисидаги сўровини қаноатлантирган. «ОВД-Инфо» ёзишича, фаол 25 кун муддатга ҳибс қилинган.

• Дмитрий Скурихин кўп йиллардан буён жамоатчилик фаоли ҳисобланади — 2014 йилдан буён у Ленинград областидаги дўкони фасадига 200 га яқин сиёсий плакатлар жойлаштирган. Россиянинг Украинага қарши кенг кўламли босқини бошлангач, у ўз дўкони деворларига ҳарбий ҳаракатлар чоғида жабрланган Украина шаҳарлари номларини ёзиб чиқа бошлади.
• 2022 йил майида Петербургнинг Ленин район суди Скурихинга Россия армиясини «обрўсизлантириш» ҳақидаги протокол бўйича 45 минг рубл миқдорида жарима қўллаганди. Бунга ушбу фаол 3 март куни ўз телеграм-каналида жойлаштирган урушга қарши ролик сабаб бўлганди.
• Кейинроқ Скурихинга армияни «обрўсизлантириш» бўйича жиноий иш қўзғатилади. «Сетевые свободы» хабарига кўра, фаолга қарши иш очилишига унинг дўконидаги урушга қарши ёзувлар суратлари, шунингдек унинг телеграмдаги каналида 2022 йил ёзида эълон қилган урушга қарши пости сабаб бўлади. Сентябр ойининг иккинчи ярмида фаолнинг уйида тинтув ишлари ўтказилади, бир неча кундан кейин суд Скурихинга нисбатан муайян ҳаракатларни тақиқлаш тарзида эҳтиёт чораси қўллайди.