Ўзбекистон нон нархи арзон бўлган давлатлар қаторига кирди

Ўзбекистон нон нархи арзон бўлган дунёдаги 5 та давлат қаторига кирди. Бу ҳақда Numbeo маълумотларига таяниб Energyprom хабар берди.

Дунёда ноннинг энг паст нархи Тунисда қайд этилган. Бу мамлакатда ярим килограмм нон 0,14 доллар (1596 сўм) туради. Ундан кейинги ўринларни Жазоир (0,16 доллар ёки 1824 сўм) ва Ливия (0,34 доллар ёки 3875 сўм) эгаллаб турибди.

Кучли бешликни Қозоғистон (0,36 доллар ёки 4102 сўм) ва Ўзбекистон (0,37 доллар ёки 4216 сўм) якунлаб берган.

МДҲ давлатларида 0,5 кг вазнли булка нон Озарбойжонда 0,39 доллар, Молдовада 0,43 доллар, Украинада 0,58 доллар, Россияда 0,61 доллар, Беларусда 0,64 доллар, Арманистонда 0,65 доллар туради.

Дунёда нон нархи энг қиммат бўлган давлатлар: АҚШ - 3,27 доллар (37260 сўм), Швейцария - 3,21 доллар (36577 сўм) ва Исландия - 2,93 доллар (33387 сўм).