Сирдарёлик эр-хотинни 40 минг долларга АҚШга юбормоқчи бўлган шахс ушланди

Самарқанд шаҳрида яшаб келган, муқаддам судланган шахс Сирдарё вилояти Оқолтин туманида истиқомат қилувчи фуқарони АҚШга жўнатиш эвазига 40 минг доллар талаб қилган.

У бир эркак ва унинг хотинини ўз танишлари ёрдамида дастлаб Европага, сўнгра Мексика орқали АҚШга юборишни ваъда қилган.

ДХХ Сирдарё вилояти бўйича бошқармаси ҳамда Иқтисодий жиноятларга қарши курашиш департаментининг ҳудудий бошқармаси билан ҳамкорликда Самарқанд шаҳрида ўтказилган тезкор тадбирда мазкур шахс олдиндан 12 минг АҚШ доллар олган вақтда ашёвий далиллар билан ушланган.

Тезкор суриштирув ҳаракатлари давомида у аввал ҳам пул эвазига бир нечта фуқарони АҚШга ноқонуний тарзда юборганлиги аниқланган. Ҳозирда ушбу фуқарога нисбатан жиноий иш қўзғатилган.