Мўғулистон ташқи ишлар вазири дипломатик муносабатлар ўрнатилганидан бери илк бор Ўзбекистонга ташриф буюради

Мўғулистон ташқи ишлар вазири Батцэцэг Батмунхийн хоним Ўзбекистон Республикаси ташқи ишлар вазири Бахтиёр Саидовнинг таклифига биноан 8-9 март кунлари расмий ташриф билан Ўзбекистонда бўлади. Бу ҳақда Монцамэ хабар бермоқда.

Ташриф доирасида Мўғулистон дипломатияси раҳбари Ўзбекистон ҳукумати раҳбарияти билан учрашади, ўзбекистонлик ҳамкасби Бахтиёр Саидов билан расмий музокаралар ўтказади.

Шунингдек, Савдо, инвестиция, қишлоқ хўжалиги ва транспорт вазирликлари вакиллари билан икки томонлама учрашувлар ўтказиш ҳам режалаштирилган. Ушбу учрашувлар кун тартибида Мўғулистон-Ўзбекистон ҳамкорлигини чуқурлаштириш, жумладан, савдо-иқтисодий ҳамкорликни кенгайтириш, халқаро ва минтақавий муаммолар юзасидан фикр алмашиш кўзда тутилган.

Мўғулистон ТИВ маълумотларига кўра, бўлажак ташриф Ўзбекистон билан 1992 йилда дипломатик муносабатлар ўрнатилганидан буён ташқи ишлар вазири даражасидаги биринчи ташриф бўлади.