Зеленский: Вазирлар маҳкамаси мудофаа учун 500 млрд гривнадан ортиқ маблағни маъқуллади

Украина Вазирлар маҳкамаси 13 март куни давлат бюджети харажатларини 537 миллиард гривнага (13,5 миллиард евро) ошириш бўйича қонун лойиҳасини қўллаб-қувватлади, маблағлар мудофаа мақсадларида ишлатилади.

Фото: president.gov.ua

Украина президенти Володимир Зеленский кечки мурожаатида таъкидлаганидек, Вазирлар маҳкамаси Олий Радага ўзгартиришларни маъқуллашни таклиф қилди. Бу пуллар армияни молиялаштириш, жиҳозлар, жумладан, учувчисиз учиш аппаратларини сотиб олишга сарфланади.

Мурожаатда Зеленский қишлоқ хўжалиги соҳаси манфаатлари йўлида миналардан тозалашни тезлаштириш зарурлигини ҳам таъкидлаган. Тахминан 170 минг квадрат километр майдонда миналар ва портламаган снарядлар қолмоқда, деди у.

Украина етакчисининг қўшимча қилишича, мамлакат шарқидаги ҳарбий вазият «жуда оғир». Белоҳиривка ва Маринка, Авдиивка ва Бахмут, Вуҳледар ва Каменка, шунингдек, бир қатор бошқа жойларда «келажагимиз қандай бўлиши» ҳал қилинмоқда, дея таъкидлади Украина президенти.