Вашингтон Украинада сулҳ тузиш чақириғига рози бўлмайди

АҚШ маъмурияти Украинада сулҳ тузиш ҳақидаги чақириқ Россия президенти Владимир Путин ва Хитой раҳбари Си Жинпинг учрашувидан кейин айтилса, бунга рози бўлмайди. Бу ҳақда Оқ уй Миллий хавфсизлик кенгашининг стратегик алоқалар бўйича координатори Жон Кирби маълум қилди.

Фото: Reuters

Унинг сўзларига кўра, сулҳ Россия раҳбариятига янги ҳужумга тайёргарлик кўриш учун кўпроқ вақт бериши мумкин.

Аввалроқ АҚШ давлат котиби Энтони Блинкен Россия ўт очиш тўхтатилишидан янги ҳужум учун фойдаланиши ҳақида гапириб ўтганди.

Бирлашган Миллатлар Ташкилоти Хавфсизлик кенгаши аъзолари Украинада «вақтинчалик ёки шартсиз ўт очишни тўхтатиш» таклифи билан чалғимасликлари керак, чунки Россия бундай ҳаракатдан кучларни қайта таъминлаш ва яна ҳужум қилиш учун фойдаланади, деган у.

«БМТ Хавфсизлик кенгаши вақтинчалик ўт очишни тўхтатиш ёки олдиндан шартларсиз ўт очишни тўхтатиш чақириқлари билан чалғимаслиги керак. Россия ноқонуний эгаллаб олинган ҳудуд устидан назоратни мустаҳкамлаш ва кейинги ҳужумлар учун ўз кучларини қайта қуроллантириш учун ҳарбий ҳаракатлар тўхтатиб турилишидан фойдаланади», - деганди Блинкен Хавфсизлик кенгаши «адолатли ва мустаҳкам тинчлик»ни таъминлаши кераклигини таъкидлаб.

Бундай «сулҳ» 2015 йилда содир бўлган, деб эслайди Блинкен: «Қаранг, кейин нима бўлди». Бир вақтнинг ўзида мамлакатларнинг Украина ва Россияга ҳарбий ҳаракатларни тўхтатишга чақириқларини у «ёлғон тенглаштириш» деб атади. «Бу урушда тажовузкор ҳам бор, қурбон ҳам бор. Россия босқинчилик учун курашмоқда, Украина озодлик учун курашмоқда. Агар Россия урушни тўхтатса, бошқа уруш бўлмайди. Украина урушни тўхтатса - Украина бўлмайди», — дея хулоса қилди Блинкен.