Франция парламенти ҳукуматга ишончсизлик вотумларини рад этди

Франция Миллий ассамблеяси вазирлар маҳкамасининг парламентда овоз беришсиз пенсия ислоҳотини ўтказишга уринишидан сўнг мухолифатдаги LIOT гуруҳи ва Марин Ле Пеннинг «Миллий бирлашув» партияси томонидан илгари сурилган ҳукуматга ишончсизлик вотумларини рад этди. Бу ҳақда 20 март, душанба куни AFP агентлиги хабар берди.

LIOT ҳужжатига 278 нафар депутат, «Миллий бирлашув» таклифига 94 нафар депутат овоз берди. Ишончсизлик вотумини қабул қилиш учун 287 овоз керак. Франция ҳукумати куни кеча конституция моддасидан фойдаланиб, вазирлар маҳкамасига ишончсизлик вотуми берилиши шарти билан, овоз беришсиз пенсия ислоҳотини амалга оширишга рухсат берди.

Шундай қилиб, кечаги овоз бериш натижасида пенсия ислоҳоти, жумладан, 2030 йилгача пенсия ёшини 62 ёшдан 64 ёшгача босқичма-босқич оширишни назарда тутувчи режа қабул қилинди, деб ёзади AFP. Бундан ташқари, ислоҳот энг кам пенсия миқдорини 1200 еврогача оширишни назарда тутади. 21 март куни қонун Конституциявий кенгашда кўриб чиқилиши керак.

Қонун лойиҳаси бутун Франция бўйлаб оммавий норозилик намойишлари, иш ташлашлар ва тартибсизликларга сабаб бўлди. Полиция ҳисоб-китобларига кўра, 15 мартда режалаштирилган якуний овоз бериш куни уюштирилган митингда мамлакат бўйлаб 480 минг киши қатнашган. Касаба уюшмалари иштирокчилар сонини 1,8 миллион киши деб ҳисоблайди. Намойишлар ўқитувчилар, транспорт ходимлари, нефтни қайта ишлаш сектори ва бошқа соҳаларнинг иш ташлашлари билан бирга кечди. Натижада ўтган ҳафтада шаҳарлараро поездларнинг деярли ярми ва ўнлаб авиарейслар бекор қилинди.

17 март куни эрталаб намойишчилар Париж шаҳар автобанини, Тулуза ва Бордодаги вокзалларни вақтинча тўсиб қўйишди. Кечқурун Париж марказидаги майдонда катта норозилик митинги бўлиб ўтди. Намойишлар Париж ва бошқа шаҳарларда давом этган, 20 март куни полиция пойтахтда кўздан ёш оқизувчи газ ва таёқлардан фойдаланган. Касаба уюшмалари 23 март куни навбатдаги умумхалқ тадбирларини режалаштирган.