Италия суди Красноярск губернаторининг ўғлини АҚШга экстрадиция қилишга рухсат берди

Италия суди Красноярск губернаторининг ўғли Артём Уссни тўртта моддадан иккитаси: нефть контрабандаси ва фирибгарлик бўйича экстрадиция қилиш имкониятини тан олди, деб ёзади La Repubblica.

Артем Усс

Милан апелляция суди россиялик тадбиркор, Красноярск ўлкаси губернатори Александр Усснинг ўғли Артём Усснинг АҚШга экстрадиция қилинишини маъқуллади, деб хабар бермоқда 21 март, сешанба куни Италиянинг La Repubblica газетаси.

Бу маълумотни Россиянинг ТАСС ахборот агентлигига Усснинг адвокатларидан бири тасдиқлади. Унга кўра, 15 кун ичида ҳимоячи кассация судига апелляция шикояти беради. Экстрадиция бўйича якуний қарор Италия қонунларига кўра, адлия вазири томонидан қабул қилинади.

La Repubblica ёзишича, суд россияликга қўйилган айбловлардан иккитасини жуда ишончли деб топди: эмбаргони четлаб ўтиш учун Венесуэла нефтини контрабанда қилиш ва банк фирибгарлиги.

Россия, шунингдек, Артём Уссни экстрадиция қилиш талаби билан Италияга мурожаат қилди, Москванинг Мешчанский суди уни жуда катта миқдордаги пул ювиш ишида сиртдан ҳибсга олди. Уснинг ўзи Италия судидан уни ватанига жўнатишни сўраган.

Артём Усс 2022 йил октябр ойида АҚШ расмийларининг илтимосига биноан Милан аэропортида қўлга олинган эди. Аввалига у қамоқда эди, лекин кейин уй қамоғига ўтказилди. Нефть контрабандаси ва фирибгарликдан ташқари, АҚШ тадбиркорни Америка ҳарбий технологияларини ноқонуний экспорт қилиш ва пул ювишда айблади. Усс билан биргаликда бу ишда айбланувчилар орасида унинг бизнес шериги, Германияда ушланган Юрий Орехов ва яна уч нафар россиялик бор.

Усс айбини рад этиб, АҚШ айбловларини сиёсий мотивга эга деб атади.