Францияда 170 дан ортиқ намойишчи қўлга олинди

Францияда пенсия ислоҳотига қарши намойишлар чоғида 170 дан ортиқ киши, жумладан, 72 нафари Парижда қўлга олинди. 23 март, пайшанба куни намойишчилар ва ҳуқуқ-тартибот кучлари ўртасидаги тўқнашувда 150 га яқин полициячи жароҳат олди.

Мамлакатнинг бир қатор шаҳарларида норозилик намойишлари бўлиб ўтди. Франция пойтахтида намойишчилар шаҳарнинг тарихий марказида тўпланиб қолган чиқинди уюмларига ўт қўйди. Бундан ташқари, AFP хабарига кўра, бир неча юзлаб қора либос кийган радикал намойишчилар банклар, дўконлар ва умумий овқатланиш шохобчаларининг ойналарини синдирган, шунингдек, кўча мебелларини вайрон қилган. Полицияга шишалар, петардалар ва тошлар отилган. Ҳуқуқ-тартибот ходимлари намойишчиларга қарши кўздан ёш оқизувчи газ ишлатган ва таёқлар билан оломонга ҳужум қилган.

Франция ички ишлар вазири Жералд Дарманинга кўра, биргина Парижда 140 га яқин ўт қўйиш содир бўлган. У зўравонликларда «полиция ва жамоат биноларига ҳужум қилиш учун» пойтахтга келган «безорилар»ни айблади. Намойишчилар томонидан бошқа шаҳарларда ҳам ёнғинлар уюштирилди. Бордода намойишчилар шаҳар мэрияси эшигига ўт қўйишди.

Франция Ички ишлар вазирлиги маълумотларига кўра, пайшанба куни бутун мамлакат бўйлаб ўтказилган намойишларда 1,089 миллионга яқин киши иштирок этган. Парижда 119 мингга яқин намойишчи кўчаларга чиқди. Касаба уюшмалари вакиллари Франция бўйлаб 3,5 миллион, пойтахтда эса 800 минг намойишчилар ҳақида маълум қилди. Улар тинч намойишларни давом эттиришга чақирди.

Францияда оммавий норозиликларга сабаб бўлган Эммануэл Макрон ваъда қилган пенсия ислоҳоти 2030 йилгача пенсия ёшини босқичма-босқич 62 ёшдан 64 ёшгача ошириш, шунингдек, энг кам пенсия миқдорини 1200 еврога етказишни назарда тутади. У ҳукумат томонидан парламентни четлаб ўтган ҳолда қабул қилинган. Бунинг учун у Франция конституциясининг махсус моддасига мурожаат қилди.