СЭС соҳасида кадрларни қайта тайёрлаш маркази ташкил этилади

Вазирлар Маҳкамасининг “Cанитария-эпидемиологик осойишталик ва жамоат саломатлиги соҳасида кадрларни қайта тайёрлаш ва уларнинг малакасини ошириш марказини ташкил этиш тўғрисида”ги қарори лойиҳаси эълон қилинди.

Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитаси ҳузурида Санитария-эпидемиологик осойишталик ва жамоат саломатлиги соҳасида кадрларни қайта тайёрлаш ва уларнинг малакасини ошириш маркази ташкил этилади.

Қуйидагилар марказнинг асосий вазифалари этиб белгиланади:

• илғор хорижий тажрибани ўрганиш асосида замонавий методикалардан фойдаланган ҳолда олий таълим муассасаларининг санитария-эпидемиологик осойишталик ва жамоат саломатлиги соҳасидаги кадрларни қайта тайёрлаш ва уларнинг малакасини ошириш бўйича умумтаълим дастурлар, ўқув-методик ва норматив материалларни ишлаб чиқиш;
• умумэътироф этилган халқаро таълим стандартлари ва талаблари, ўқитишнинг замонавий шакллари, илғор педагогик, ахборот-коммуникация ва инновация технологиялари асосида санитария-эпидемиология соҳасидаги кадрларни қайта тайёрлаш ва уларнинг малакасини ошириш;
• тегишли йўналишларнинг ўқув дастурига мос ҳолда ишлаб чиқилган ўқув-методик ресурслар асосида масофадан ўқитишнинг онлайн ва оффлайн шаклларида қайта тайёрлаш ва малака ошириш курсларини ташкил этиш;
• малака оширишнинг таълим жараёни сифати ва натижаларини тизимли таҳлил қилиш, мониторингини олиб бориш;
• биологик хавфсизлик соҳасида кадрлар салоҳиятини мустаҳкамлаш ва мутахассисларни тайёрлаш тизимини такомиллаштириш, шу жумладан токсиколог, профпатолог, эпидемиолог, бактериолог, вирусолог, паразитолог, энтомолог ва эпизоотолог каби мутахассисларни тайёрлаш механизмларини такомиллаштириш ва нуфузини ошириш;
• биологик жиҳатдан хавфли объектлардан фойдаланишда биологик хавфсизликни таъминлаш учун кадрлар, шу жумладан маъмурий-техник ходимларни тайёрлаш даражасини ошириш;
• биологик хавфларни таҳлил қилиш, хавфларни бошқариш технологияларини қўллаш каби йўналишларда ўқув дастурларини ишлаб чиқиш;
• идоралараро ҳамкорлик қилиш, шу жумладан биологик тусга эга фавқулодда ҳолатларнинг оқибатларини бартараф этиш бўйича машқлар ва машғулотларни ўтказиш;
• санитария-гигиеник фаолиятнинг самарадорлигини ошириш, санитария-эпидемиология институтларнинг фаолиятини мувофиқлаштириш ҳамда илмий-методик ишларни ташкил этиш;
• халқаро алоқаларни кенгайтириш ва мустаҳкамлаш, конференциялар, кўргазмалар ва бошқа тадбирлар ўтказиш орқали санитария-эпидемиологик осойишталик ва жамоат саломатлиги соҳасида мамлакатимиз ютуқларини халқаро даражада кенг ёритиш, хорижий таълим муассасалари билан ҳамкорлик қилиш;
• марказда кадрларни қайта тайёрлаш ва уларнинг малакасини ошириш бўйича параметрларини Санитария-эпидемиологик осойишталик ва жамоат саломатлиги қўмитаси билан келишилган холда тасдиқлаш.