НАТО бош котиби Швеция яқин орада ташкилотга қабул қилинишига ишонч билдирди

Шимолий Атлантика иттифоқининг янги кенгайиши яқин ойларда содир бўлиши мумкин.

Шимолий Атлантика альянси Швеция Финландиядан кейин НАТОнинг тўлиқ аъзоси бўлишини таъминлаш учун ҳамма нарсани қилади. Бу ҳақда 4 апрел, сешанба куни ташкилот бош котиби Йенс Столтенберг маълум қилди. «Ишончим комилки, шундай бўлади», деди у Финландиянинг альянсга кириши тантанали маросими бўлиб ўтадиган Брюсселдаги НАТО ташқи ишлар вазирлари йиғилиши олдидан. Мамлакат ташкилотнинг 31-аъзосига айланади.

Столтенберг аввалроқ Швециянинг НАТОга киришига ҳафталар ёки ойлар кетиши мумкинлигини айтган эди. Ҳозирча унинг қабул қилиниши альянснинг икки аъзоси – Венгрия ва Туркия томонидан ратификация қилинмаган. Анқара, хусусан, Швеция ҳукуматини курд экстремистларига қарши фаол курашмаётганликда айблайди, бу эса ратификация қилиш шартларидан биридир. Столтенберг бу мавзуни Туркия президенти Ражаб Тоййиб Эрдўған билан муҳокама қилганини таъкидлаб ўтди ва у яқин келажакда ўзгариш юз бериши мумкинлигига ишонтирган.

Финландиянинг НАТОга қабул қилиниши ҳақида Столтенберг альянс Ҳелсинки розилигисиз ҳудудига бошқа аъзо давлатларнинг қўшинларини жойлаштирмаслигини айтди. Шунингдек, у Финландия билан олиб борилган музокараларда мамлакатда НАТО доимий базаларини ташкил этиш масаласи ҳалигача муҳокама қилинмаганини қайд этди. 

Ўз навбатида, Россия ТИВ Москва Финландиянинг НАТОга кириши муносабати билан жавоб чораларини кўришини, аниқ қадамлар эса мамлакатнинг альянсга интеграциялашуви шартларига, жумладан, «унинг ҳудудида НАТО ҳарбий инфратузилмаси ва қурол тизимларини жойлаштиришга» боғлиқ бўлишини айтди.

Россия президенти матбуот котиби Дмитрий Песков НАТОнинг кенгайишини РФ хавфсизлиги ва манфаатларига тажовуз деб атади. «Бу бизни тактик ва стратегик қарши чоралар кўришга мажбур қилади», деди у брифингда.