Андижонлик отахонлар 43 кунда велосипедда Мадинага етиб борди. Яна 12 киши ҳажни адо этиш учун йўлга чиқишган

65-70 ёшдаги отахонлар 27 февраль куни Андижон вилоятининг Қорасув шаҳридан умра зиёратини бажариш учун велосипедда йўлга чиқишганди. MY телеканалида эфирга узатилган видеолавҳада улар 10 апрелгача Мадинага етиб боришгани ҳикоя қилинади.

 “Шу ёшимизда, мана, 65-70 ёшга кирган эканмиз, Аллоҳ ўзи куч-қувват берди, мадад берди. Эмон-омон Мадинага келиб олдик”, дейди яқинларига видеохабар юборган кекса зиёратчилардан бири.

Телеканалда, шунингдек, Қирғизистоннинг Ўш шаҳридан Маккага велосипедда йўлга чиққан отахон 22 кунда Маккага етиб боргани, йўлда у автомобил хизматидан ҳам фойдалангани ҳақида хабар берди. Ижтимоий тармоқларда тарқалган видеолавҳада қаҳрамоннинг исми келтирилмайди.

“27 март куни йўлга чиққанман. Йўлда машинага ҳам чиқдим, чунки фақат велосипед билан бу ергача етиб келиш қийин.

Ўғлим Москвада ишлайди. Яхши велосипед олиб жўнатворгин, деб пулини берворгандим. Жўнатворди”, дейди зиёратчи.

Ўзи билан велосипед эҳтиёт қисмлари ва бирозгина пул олиб, таваккал билан йўлга чиққан қария Қорақалпоғистонгача бориб, Туркманистон орқали сафарини давом эттирмоқчи бўлади. Бироқ ушбу мамлакатга уни визасиз киритишмайди. Шундан сўнг у Қозоғистон орқали, сўнг бошқа давлатлар орқали Озарбойжон, Туркия, Иордания, Бирлашган Араб Амирликлари орқали Саудия Арабистонига кириб борган.

“Йўлда келарканман, шаҳардан шаҳарга боришда йўлда зоғ учмайди. Парвардигордан: “Менга шерик йўқ, шеригим Ўзингсан. Йўлда мени қийнаб қўйма”, деб сўраб, дуо қилиб келавердим.

Йўлда яхши одамлар учраб, уларнинг кўмаги билан Маккагача етиб келдим”, дейди отахон.

63 ёшда учинчи бор Саудия Арабистонига келган эркак икки ой Маккада қолиб, ҳаж зиёратини ҳам адо этиб, кейин ортга қайтиш ниятида эканини билдирган.

“Кетишда ҳам келган йўлим билан кетаман. Меҳрибончилик қилган одамлар жуда кўп бўлди. Ўшалар билан кўришиб, ўтиб кетмоқчиман. Худо хоҳласа ҳаж зиёратини адо этиб, кейин қайтаман”, дейди ўшлик нуроний.

24 апрель куни икки нафар зоминлик оқсоқол – Шербой Ҳусанов ҳамда Мамарайим Қаршибоев ҳаж зиёратини адо этиш учун велосипедда Саудия Арабистони томон йўлга чиқишган. Бу ҳақда Kun.uz’га уларнинг яқинлари хабар беришди.

Маълум бўлишича, Шербой ота 66, Мамарайим ота эса 60 ёшда. Улар Туркманистон, Эрон ва Кувайт орқали Саудия Арабистонига боришмоқчи. Яқинларининг сўзларига кўра, отахонлар сафарга астойдил тайёргарлик кўришган ва сафар давомида чегарасини босиб ўтадиган давлатларнинг визаларини ҳам олишган.

MY телеканалининг хабар беришича, 1 апрель куни Андижондан беш қария, бундан ташқари, фарғоналик беш маҳалладош ҳам ҳаж зиёратига бориш учун велосипедда йўлга чиқишган.

Аввалроқ Kun.uz велосипедда Ҳажга уч бор йўлга чиқиб, бир сафар Эрон, кейин Туркманистон ва учинчи сафар эса Сурия чегарасидан қайтган марғилонлик 85 ёшли Ғанижон Мамадиев ҳақида ёзганди.