Дипломат Швейцариянинг Украинага снарядлар етказиб беришдан бош тортганини тушунтирди

Швейцариянинг Берлиндаги элчиси Пол Рене Сегер Германияга Украинага Gepard ўзиюрар зенит қуроллари учун Швейцарияда ишлаб чиқарилган снарядларни етказишга рухсат бермаган Берндаги ҳукумат позициясини тушунтирди.

Швейцария ҳарбий куч ишлатишдан воз кечди, «бу биз урушни қўллаб-қувватламаслигимизни ҳам англатади», деди у 24 апрель, душанба куни чоп этилган Германиянинг Augsburger Allgemeine газетасига берган интервьюсида. Сегер Швейцария учун фундаментал аҳамиятга эга бўлган бетарафлик талабига ишора қилди. «Бу бизнинг ДНК бир қисми», деб қўшимча қилди дипломат. 

Шунингдек, у Киевга ўқ-дорилар етказиб бериш тақиқлангани сабабли Швейцария ҳукуматига нисбатан «танқид кўлами»дан ҳайратда қолганини айтди. «Сизда Путин урушда ғалаба қозонган тақдирда Швейцарияга айб улуши қўйилади деган таассурот пайдо бўлади. Лекин 12 минг снаряд урушга таъсир қилмайди ва унинг натижасини ҳал қилмайди», - деди Сегер. 

Германия ўтган ёзда Берн ҳукуматидан Gepard ЎЗҚ учун Украинага 12 400 снарядни реэкспорт қилишга рухсат сўради. Шундан сўнг Швейцария ўзининг бетарафлигини айтиб, бу сўровни рад этди. Кузда Германия Бернга янги сўров юбориб, ғалла экспорти учун муҳим бўлган Украинадаги инфратузилма ва денгиз портларини ҳимоя қилиш зарурлигига ишора қилди. Бироқ, Швейцарияда буни яна рад этди.